1139
Буряад Уласта Москва хотын үдэрнүүд гэһэн хэмжэ ябуулгада дашарамдуулан, Ц. Сампиловай нэрэмжэтэ музейдэ Москва тухай “Отоваренная мечта” гэһэн үзэсхэлэн дэлгээгдэбэ.
Александр Родченко, Аркадий Шайхет, Борис Игнатович, Всеволод Тарасевич, Дмитрия Бальтерманц, Виктор Ахломов болон бусад совет үеын гэрэл зураг буулгагшадай ажалнуудыень Улаан-Үдын ажаһуугшад болон айлшад хараха аргатай болобо.
“Тэдэнэй зарим гэрэл зурагуудые эндэл түрүүшынхиеэ харабаб. Совет үедэ юумэнэй хомор байһан сагые һануулан, үри хүүгэд, аша гушанарнай тэрэ үеын байдал тухай эндэ дэлгэгдэһэн гэрэл зурагуудые хаража, мэдэхэ болохо”, - гэжэ Москва хотын Үндэһэтэнэй бодолгын болон можо хоорондын харилсаануудай департаментын хүтэлбэрилэгшэ Виталий Сучков хэлэбэ.
Мультимедиа арт-музейн бэлдэһэн 120-ёод гэрэл зурагуудай үзэсхэлэн сентябриин 3 болотор дэлгэгдэхэ.
“Юумэнэй хомор байһан саг тухай бэшэ, харин совет үедэ ажаһуугшадай байдал тухай гэрэл зурагуудта харуулагдана. Дэлгэгдэһэн үзэсхэлэн манай уласай соёлой ажабайдалда һонирхолтой хэмжээ ябуулгануудай нэгэ болохо”, - гэжэ Буряад Уласай соёлой уялгануудые дүүргэгшэ Тимур Цыбиков тэмдэглэбэ.
Анна Огороднигой гэрэл зурагууд.
