979
Москва хотын Үндэһэтэнэй бодолгын болон можо хоорондын харилсаануудай департаментын түрүүлэгшэ Виталий Сучков Буряад Уласай Үндэһэтэнэй номой санда баяр ёһололой оршондо номуудые бэлэглэбэ. Энэ хэмжээ ябуулгада Буряад Уласай Соёлой сайдай уялгануудые дүүргэгшэ Тимур Цыбиков, Үндэһэтэнэй номой сангай захирал Людмила Гармаева хабаадалсабад.
Москва хотын Засагай газар Үндэһэтэнэй номой сангай жасада 243 номууд болон 10 альбомуудые бэлэглэбэ. Номуудай суглуулбарида һонирхолтой энциклопединүүд, альбомууд, хүүгэдтэ зорюулагдаһан номууд, уран зохёол болон бусад хэблэлнүүд оронхой.
- Һонирхоһон асуудалнуудтаа харюунуудые энэ суглуулбарида олохоор. Бэлэглэһэн номууд хүнүүдэй һонирхол татажа, үшөө олон уншагшадтай болохыетнай хүсэнэбди, - гэжэ Виталий Сучков хэлэбэ.
Буряад Уласай Соёлой сайдай уялгануудые дүүргэгшэ Тимур Цыбиковай хэлэһэнэй ёһоор, сентябрь һарада эмхидхэгдэхэ Номой салондо олоной һонирхолдо энэ номууд дэлгэгдэхэ юм. Удаань хомор, үнэтэй номуудай таһагта хадагалагдаха.
- Энэ суглуулбарида соёл урлаг, уран зохёол, болон Москва хотын түүхээр һонирхолтой номууд олон, - гэжэ Тимур Цыбиков хэлэбэ.
Москвагай түлөөлэгшэд Үндэһэтэнэй номой сангай ажаябуулгатай танилсажа, “Буряад Уласай соёл” гэһэн гүрэнэй программаар хэблэгдэдэг номуудай үзэсхэлэн хаража, урмашаба.
Анна Огороднигой гэрэл зурагууд.
