1215
Июлиин 12-то Улаан-Үдын Соведүүдэй талмай дээрэ Буряад Уласта Москва хотын үдэрнүүд гэһэн хэмжээ ябуулгын нээлгын баяр ёһолол болон “Хор Турецкого” бүлэгэй тоглолто үнгэргэгдэбэ.
Буряад Уласай Толгойлогшын уялгануудые дүүргэгшэ Алексей Цыденов, Москва хотын Үндэһэтэнэй бодолгын болон можо хоорондын харилсаануудай департаментын хүтэлбэрилэгшэ Виталий Сучков гэгшэд сугларагшадые мэндэшэлжэ, баярай үгэнүүдые хэлэһэн байна.
“Виталий Иванович Сучков болон бусад ниислэл хотын түлөөлэгшэдтэй хамта мүнөөдэр аша үрэтэйгөөр ажалаа ябуулжа, хэмжээ ябуулгануудта хабаадажа, олон асуудалнуудаар зүбшэн хэлсээбди. Саашадаа нягта харилсажа, соёл, урлагай, болбосоролой, эмнэлгын һалбаринуудта дүй дүршэлөөрөө хубаалдажа, суг ажал ябуулха талаар хэмжээ ябуулгануудай түсэб табихабди, - гэжэ Алексей Цыденов хэлэбэ.
Москва хотын Үндэһэтэнэй бодолгын болон можо хоорондын харилсаануудай департаментын хүтэлбэрилэгшэ Виталий Сучков Москва хотын засаг дарга Сергей Собянинай зүгһөө сугларагшадые амаршалжа, баярай дулаан үгэнүүдые хэлэбэ.
- Гайхамшагта Байгал далай, оршон тойрон байгаали, һайхан уласай баялиг ажалша, хүндэмүүшэ, һайн зантай Буряад Уласай ажаһуугшад. Саашадаа Москва хото, Буряад Уласай хоорондохи харилсаан улам бэхижэжэ байг лэ, - гэжэ Виталий Сучков тэмдэглэбэ.
Удаань Виталий Сучков, Буряад Уласай Дайнай, ажалай, сэрэгэй ба сагдаагай ветерануудай (пенсионернүүдэй) зүблэлэй түрүүлэгшэ Ревомир Гармаев, Ниигэмэй хамгаалгын яаманай сайдай уялгануудые дүүргэгшэ Татьяна Быкова гэгшэд Москва шадар байлдаанда хабаадаһан Буряад Уласта ажаһуудаг дайнай ветерануудта дурасхаалта бэлэгүүдые барюулба.
Тиихэдэ “Минии Москва” гэһэн онлайн-мүрысөөнэй 15 илагшадта ниислэл хотоор аяншалха путёвконуудые Виталий Сучков барюулһан байна.
Һүүлээрнь 2 часай туршада “Хор Турецкого” бүлэг тоглолто табиһан байна. Дэлхэйдэ болон Ородой Холбоото Улас дотор суута арт-бүлэг мэдээжэ дуунуудые Соведүүдэй талмайда сугларһан арад зонтой хамта дуулаба. Тэдэнэр “Смуглянка”, “И вновь продолжается бой…”, “Там, где клён шумит” болон бусад дуунуудые гүйсэдхэжэ, харагшадай зүрхэ сэдьхэл доһолгожо, уяруулжа шадаа.
Буряад Уласай Толгойлогшын уялгануудые дүүргэгшэ Алексей Цыденовые тайзан дээрэ бүлэгэй хүтэлбэрилэгшэ Михаил Турецкий уриба. Олон тоото арад зонтой хамта “Надежда” гэһэн дуу Алексей Самбуевич дуулаһан байна.
Тайзан дээрэ эрэшүүлһээ гадна, эхэнэрнүүдэй “Сопрано Турецкого” гэһэн бүлэг харагшадые баһал баярлуулаа. Хужарлаһан Улаан-Үдын ажаһуугшад болон айлшадай нэрьемэ халуун альга ташалга удаан сагта замхаагүй.
Буряад уласта Москва хотын үдэрнүүд июлиин 11-14-нэй үдэрнүүдтэ эмхидхэгдэнэ гэжэ һануулнабди. Тиихэдээ Илалтын хүшөөгэй дэргэдэ дайнай ветерануудай дурасхаал мүнхэлэн, хэмжээ ябуулга үнгэргэгдэжэ, Үндэһэтэнэй номой санда Москва хотын засагай газар номуудые бэлэглэжэ, Ц. Сампиловай музейдэ гэрэл зурагуудай үзэсхэлэн дэлгэгдэһэн байна.
Москва хотын түлөөлэгшэд мүнөөдэр Кабанск аймагай Сэлэнгэ һуурин гаража, Буряад Уласта Москва хотын үдэрнүүдэй хэмжээ ябуулганууд үргэлжэлхэ. Тиихэдэ “Теноры XXI века” гэһэн бүлэгэй тоглолто табигдаха юм.
Анна Огороднигой гэрэл зурагууд.
