​Үйһэн урлал

Зунай зулгы дунда һарада Буряадай арадай уран зохёолшо Исай Калашниковай нэрэмжэтэ Улаан-Yдэ хотын түбэй номой санда эндэхи мэргэжэлтэ Оксана Москаленко гэгшын оролдолгоор мэдээжэ багша, арадай дархан, ирагуу найрагша Валерий Цыбиковэй бүтээлнүүдэй үзэмжэ дэлгэгдээ. 

Энэ үзэмжэ хараһан хүнүүдэй һанамжа дурадхая. Шэбэртэ нютагай ажаhуугша, багшын ажалай ветеран Цырендондок Зандраев:

- Намтай үүри, сасуутан болохо талаан бэлигтэй Валерий Дашеевичэй бүтээлнүүдые хаража баясабаб. Хуһаар элдэб юумэ хэдэг, үйһөөрнь олон янзын амһарта, илангаяа түйсэнүүдые хэдэг гэжэ һайн мэдэхэб. Теэд иимэ олон ондоо ирагуу найрагта хабаатай зүйлнүүдые урладаг юм байна гэжэ мүнөөл мэдэбэб. Энэ үүримни иихэдээ бурханhаа табисууртай юм байна. Эдэ бүтээлнүүдэйнь гоё hайханиие, уран нариниие хэлэнгүй, имагтал хүмүүжүүлхы ехэ удха шанарынь тэмдэглэнэб. Иимэ бэлигтэй бэрхэ хүнүүдэй байгаа сагта буряад арадай талаан бэлиг улам дээшээ бадаржал, түрэл Буряад оромнай һалбаржа байха. 

Энэ үзэсхэлэн эмхидхэһэн номой сангай ажалшадта баярые хүргэнэб. Номой сандал уран зохёолоо, урлалаа, үндэһэн соёлоо ойлгохо зон ерэнэ ха юм. 

“Хүндэлэлэй Тэмдэг” орденой кавалер, Ородой Холбооной габьяата багша Бадма Базарова:

- Ехэ соморхоноор аад, нюдэндэ дулааханаар түхеэрэгдэһэн үзэмжэ гэжэ анхарбаб. Үзэмжын нюусануудые һайн ойлгохол хүнүүд бүхы зүйлнүүдые зохилдуулжа табяа байна. 

Илангаяа ирагуу найрагшадай уран мүрнүүдые үйһэн дээрэ урлажа, уран гоёор шэмэглэһыень һайшаанаб. Хуһан модондо дуратай Сергей Есенинэй, Буряадаймнай жэргэмэлнүүд Дондок Улзытуевай, Лобсон Тапхаевай, Геннадий Ринчиногой ирагуу мүрнүүд, дүрэ зурагууд һонирхуулна. 

Саашадаа талаан бэлигээ улам хурсадхажа, шэнэ уран зүйлнүүдые урлахыень Валерэдэ хүсэнэб. Yйһөөр урлаһан дэлхэйн арадуудай бүтээлнүүдээр һонирхожо, эрхим дээжынь жэшээгээр урлажа ябыш даа. 

Валерий Цыбиковэй бүтээлнүүд

Аркадий Батомункуевай гэрэл зурагууд