​Буряад-монгол түмэнэй соёлой үдэрлиг

2017 оной 7-р һарын 8-да Монгол Уласай ниислэл Улаанбаатарта Тулгар түрын 2226 жэлэй, Ехэ монгол уласай 811 жэлэй, Арадай хубисхалай 96 жэлэй, Үндэhэнэй ехэ баяр нааданай хүреэндэ “Аза жаргалтай Улаанбаатар” гэhэн уряа доро зохёон байгуулагдаhан Буряад-Монгол түмэнэй соёлой үдэрлигэй “Бизнес уулзалта” болобо. 

Энэ соёлой наадан, бизнес уулзалгые мүнөө шэнээр эмхидхэн бии болгогшо Б.Доржопүрбэ түрүүлэгшэтэй “Буряад-Монголой соёл, спортын холбоо” гэгшэ ниитын байгуулга эмхидхэн ябуулаа. 

Буряад-монгол угсаатанай уламжалта соёл, ажахын үйлэдбэри бии болгохо, буряад-монгол угсаатанай таража һуурижаһан газар нютагта аяншалга хүгжүүлхэ, буряад соёл, спорт хүгжүүлхэ, хойто үеын хүүгэд залуушуулдаа буряад соёл, зан заншал заажа һургахань нэн түрүүндэ хэрэгтэй байна гэжэ энэ уулзалгада сугларһан зон дүгнэбэ. 

Мүн энэ соёлой нааданаар Дорнод аймагай Дашбалбар сомоной харьяата фотограф Б.Батцэрэнэй нангин фото-зурагууд, Цагаан-Овоо сомоной харьяата уран hиилүүршэн, арадай дархан Ц. Лубсандашын бүтээлнүүд, Хэнтэй аймагай Дадал сомоной харьяата эдэй засагай ухаанай доктор Д. Болдбаатарай бэшэhэн номын үзэсхэлэн дэлгээгдэжэ, олоной нюдэ хужарлуулба. Нааданай түгэсхэлдэ буряад-монгол дуушад хонгёо hайхан аялгата дуугаар наадандаа ерэhэн олон зоной сэдьхэлые баясуулба.