1063
Мүнөөдэр, июлиин 13-да, Буряадай гүрэнэй филармонидо “Голос кочевникOFF” гэһэн хэмжээнэй 2-дохи тоглолто үнгэргэгдэхэ юм.
Испаниин Гранада хотын “Гранада” театр фламенко хүгжэм дуу, зүжэг наада харагшадта дурадхаха юм. Июлиин 14-15-най үдэрнүүдтэ Асагадта үнгэргэгдэхэ “Нүүдэлшэдэй аялга” программада фламенко театр ороогүй юм.
Июлиин 11-дэ “Голос кочевникOFF” гэһэн тусхай программын хэмжээндэ Буряадай филармонидо Бадма-Ханда Аюшеева, медиа-зураашадай “Struttura” бүлэг, хүгжэм найруулагша Денис Хоров гэгшэд һонирхолтой түсэл бэлдэжэ, тоглолто табиһан байна. Тиихэдээ буряад арадай дуунууд мүнөө үеын хүгжэмдэ найруулагдажа, тайзанай ара талада худилдаг зурагуудтай тааралдуулһан тоглолто хотын ажаһуугшад болон айлшад хараха аргатай байгаа. Олоной һонирхол татаһан ара талын зурагууд амиды шэнги, хүдэлжэ, миралзажа, үльгэрэй орондо байһан мэтээр үзэгдэбэ.
“Зэдэлжэ байһан дуунай аялгатай тааралдан, ара талын зурагууд хубилна”, - гэжэ тоглолтын эхиндэ Буряадай гүрэнэй филармониин хүтэлбэрилэгшэ Наталья Уланова хэлэбэ.
Бадма-Ханда Аюшеевагай бэлдэһэн “Звук. Восток” гэһэн түсэл энэ үдэшэ сугларагшадта ехэ һайхашаагдаа. Денис Хоров рояль дээрэ наадажа, шэдитэ хүгжэм зэдэлбэ. Бадма-Ханда Аюшеевагай дуулажа эхилхэдэ, зүрхэ сэдьхэл доһолжо, абяаень дахан, дүүлин ниидэхэ мэдэрэл түрөө һэн. Энэ тоглолтодо Намгар Лхасаранова Бадма-Ханда Аюшееватай хамта дуулажа, харагшадые баясуулаа.
“Voice of Friends” (“Нүхэдэй ая дуун”) гэһэн 2-дохи таһагта мэргэжэнги дуушад бэшэ, Улаан-Үдын мэдээжэ сурбалжалагшад, уран һайханай коллективүүдэй түлөөлэгшэд хабаадаа. Эрхүү хотын “Доктор ДЖАЗ” гэһэн бүлэгэй хүгжэм доро джаз, рок-н-ролл болон бусад хүгжэмэй һалбаринуудта арадай болон мүнөө үеын дуунуудые тэдэнэр гүйсэдхөө. Ородой драмын театрай зүжэгшэд Алена Левицкая-Байбородина, Владимир Барташевич, олониитын ажаябуулагша Мария Ханхунова, “Максимальный эффект” программын хүтэлэгшэ Максим Дашинимаев, олзын хэрэг эрхилэгшэ Денис Гармаев, режиссёр, хүгжэм найруулагша Сойжин Жамбалова, телевидениин хүтэлэгшэ Алексей Туробов, сурбалжалагша Ирина Тушинова, Synergy group компаниин захирал Тумур Дондуков, хэмжээ ябуулгануудые хүтэлэгшэ Александр Малханов, “Авторадио Улан-Удэ” радиостанциин редактор Константин Назаров гэгшэд хэмжээ ябуулгада хабаадаһан байна.
Анна Огороднигой гэрэл зурагууд.
