1070
2017 оной июлиин 4- 13-най үдэрнүүдтэ Краснодарай хизаарай Туапсе аймагта үнгэргэгдэһэн “Большая перемена” гэһэн үндэһэтэнэй фестиваль-мүрысөөндэ Буряад Уласай арадай уран бүтээлэй түбэй арадай аман зохёолой “Уряал” ансамбль хабаадаһан байна.
“Арадай дуун (ансамбль)” гэһэн номинацида “Уряал” ансамбль Гран-при хүртэбэ.
- Буряад арадай дуунуудые урданай маягаар дуулаха манай ансамблиин бэлиг шадабари фестиваль-мүрысөөнэй жюриин гэшүүд үндэрөөр сэгнэбэ. Түрэл арадайнгаа ёһо заншал сахижа, ургажа ябаа улаан бургааһадые һургаха, дамжуулха талаар ансамблиин ябуулдаг ажал тэдэнэр онсолон тэмдэглэбэ, - гэжэ уласай уран бүтээлэй түбтэ хэлэнэ.
“Ородой Холбоото Уласай эрхим түсэлнүүд” гэһэн федеральна Гранд-үзэсхэлэнэй дипломоор шагнагдаһан үндэһэтэнэй фестиваль-мүрысөөн Ород гүрэнэй Соёлой яаманай хэмжээ ябуулгануудай үндэһэтэнэй литэдэ ородог юм. Энэ хэмжээ ябуулга Ородой Холбоото Уласай Гүрэнэй Дүүмын соёл хүгжөөлгын хороон, Краснодар хизаарай Туапсе аймагай захиргаан болон бусад эмхи зургаануудай дэмжэлгэээр үнгэргэгдэдэг юм.
Арадай аман зохёолой “Уряал” ансамбль 1982 ондо байгуулагдажа, мүнөө хүрэтэр амжалтатайгаар ажалаа ябуулдаг. “Уряал” ансамбль бүхэроссиин хэмжээнэй фестиваль мүрысөөнүүдтэ эдэбхитэйгээр хабаададаг юм.
Буряад Уласай Соёлой яаманай сайтһаа гэрэл зураг абтаба.
