​"Нүүдэлшэдэй ая дуун" - аяншадые олошоруулха арга боломжо

Буряад Уласай Толгойлогшын уялга дүүргэгшэ Алексей Цыденов “Нүүдэлшэдэй ая дуун” хадаа элдэб үеын хүнүүдтэ тааруулан ба гэр бүлөөрөө амаралгада шэглүүлэн зохёогдоһон уласхоорондын хүгжэмэй фестиваль гээшэ гэжэ тэмдэглээ. Тэрэнэй хэлэһээр, Засагай газар эмхидхэгшэдтэ тус нааданай хэмжээ үргэдхэхэдэнь туһалжа, Буряад орон руу аяншалагшадые олошоруулха зорилготой. 

– Бидэ фестивалиие забхай найр наадан болгонгүй, хүн зоной гэр бүлөөрөө ерэжэ, аятайгаар амардаг газар болгохо зорилго табинабди. Юуб гэбэл, эндэ ганса хүгжэм бэшэ, зугаасалгын элдэб янзын хэмжээ ябуулганууд дурадхагдана. Харин манай зорилго – хэмжээень ехэдхэхэ. Энэ хадаа онсо шэнжэеэ, үндэһэн соёлоо харуулха һайн арга гээшэ. Тиимэһээ энэ жэлһээ “Нүүдэлшэдэй ая дуун” урагшаа даб гэжэ, ехэ алхамуудые хэжэ эхилхэ гэжэ найданабди. Тус түсэлэй уласхоорондын хэмжээтэй хадань, бүри олон зоной ерэхээр, хари гүрэнүүдэй бүлгэмүүдэй бэлигээ харуулхаар эрхэ байдал тогтоохо хүсэлтэйбди. Ород гүрэнэй бүхы ажаһуугшад Буряад орон ерэжэ хараха ёһотой: манай нютаг нэгэл янзатай бэшэ, түхэл шарайнь ехэ баян. Эндэмнай Байгал далай бии, нуурнуудшье, хадануудшье, тала дайдашье бии. Гансал бидэ иимэ байгаалитайбди. Буряадта олон юумэ харахаар, - гэжэ Алексей Цыденов онсолоо.

Буряадай соёлой сайдай уялгануудые дүүргэгшэ Тимур Цыбиковэй тэмдэглэһээр, “Нүүдэлшэдэй ая дуун” манай гүрэнэй шагнагшадые хари гүрэнүүдэй олон хүгжэмэй бүлгэмүүдтэй танилсуулна.

– Бидэ тус наада юһэдэхиеэ үнгэргэнэбди. Энэ хэмжээ ябуулга Буряадай ажаһуугшадай ажабайдал һонирхолтой болгохо үүргэтэй юм. Манай уласта амаралга ганса Байгалтай бэшэ, мүн ялас гэмэ үйлэ хэрэгүүдтэй холбоотой. Фестивалиие манай уриһан артистнар бүри һонирхолтой болгоно. Хүгжэмэй зохёолнууд этнофутуризмда хабаатайшье һаа, ямаршье хүнэй шагнажа хужарламаар. Тиихэдээ наһатайшье зониие, залуушуулыешье һонирхуулха хүгжэм зэдэлдэг. Олон хүгжэмшэд Ород гүрэн түрүүшынхиеэ ерэдэг. Тиин “Нүүдэлшэдэй ая дуун” гүрэнэймнай шагнагшадые шэнэ хүгжэмшэдтэй танилсуулна гээшэ, - гэжэ Тимур Цыбиков һанамжаараа хубаалдаа. 

Июлиин 14-15-да наадан дүн хамта 6,5 мянган хүниие суглуулаа. Энэ хэмжээ ябуулгада 8 жэлэй туршада 50 гүрэнэй бүлгэмүүд хабаадаһан байна. Тэрэ Асагад һууринай “Талын нүүдэлшэн” гэһэн этнокомплексын дэбисхэр дээрэ эмхидхэгдэдэг юм. 2009 онһоо эхилжэ, мэргэжэлтэ бүлгэмүүд хабаададаг болонхой. Тэдэ арадай хүгжэм дээрэ үндэһэлжэ, мүнөө үеын хүгжэмэй урлиг зохёодог. “Нүүдэлшэдэй ая дуун” хадаа Ураалһаа нааша дэбисхэрэй worldmusic фестивальнуудай ехэнүүдэй тоодо ороно. Нааданай айлшад нүүдэлшэдэй хүгжэм шагнахаһаа гадна үндэһэн эдеэ хоолой зүйлнүүдые туршаа, элдэб янзын мастер-классуудта мүн тамирай наадануудта хабаадаа. 

Мүнөө жэлдэ фестиваль 6,5 мянган хүниие суглуулаа

Аяншалагшадай тоо олошоруулха зорилго табигдана

Даша Намдаков "Нүүдэлшэдэй ая дуунда" ерээ

Аркадий Зарубинай гэрэл зурагууд