​"Юундэ лодырь гэнэб?"

«ЮУНДЭ ЛОДЫРЬ ГЭНЭБ?»

Дабаатын Баир Содномовай Марина басаган Cаха-Яхад Уласта хүдэлхэдөө, тэндэхи яхад хүбүүнтэй танилсаа. Зунай үдэрнүүдтэ амаралта абажа нютагаа ерэхэдээ, нүхэрөө асарба. 

Баир Батомункуевич, Ирина Мункуевна түрэлхидынь хоюулаа бэрхэнүүд, ажалдаа нэтэрүү юм. Гэртэ газаань сэбэр, үлүү юумэнэй хэбтэхые харахагүйш. Гэрэй эзэд ороһон хүниие һайнаар угтажа, хүндэлжэ байдаг. 

Энэл заншалаараа хоёр залуушуулые һайнаар угтаа. Залуушуул амаралтада ерээбди гээд миин һуунгүй, газаахи ажалдань туһална. Хүдөөгэй ажал дүүрэхэ бэшэ, үбһэ хуряажа хашаадаа оруулха, тойроод байһан хорёонуудые һэлгэхэ гэхэ мэтэ ажал байгаа ааб даа. 

Айлшан хүбүүн яhала ажалша хаш, эсээб гэнэгүй. Маринын гэртэхин айлшанаа хайрлажа, амаруулха һанаатайгаар үглөөдэр гээд лэ ходо хэлэнэ. 

Ниилээд хүдэлһэн хойноо айлшан хүбүүн Маринаһаа һураба: 

- Шинии гэртэхин юундэ намайе лодырь гэнэб? 

Басаган ойлгожо ядаба. “Үглөөдэр” гэһэн үгые яхад хүбүүн “лодырь” гэжэ буруу ойлгоһон байгаа.

“БҮ ХӨӨШХЭТЭ”

Намтай сугтаа һураһан Дамба Галсандашиев Шэбэртынгээ дунда һургуули дүүргээд, Улаан-Үдын Буряадай хүдөө ажахын дээдэ һургуулиин ветеринарна таһагай оюутан болоо һэн. Тэрэ жэлдэ Шэбэртын олонхи хүбүүд, басагад хүдөөгэй мэргэжэлтэд болохо зорилготой энэ дээдэ һургуулида оюутад болоһон байгаа. 

Хүдөөгэй залуушуул хотодо байжа үзөөгүйшье һаа, түлэг залуу наһан хаана ошохоб, хүбүүд басагад танилсаа бэд даа. Дамба эгээл дурлаха наһандаа ха юм, залуу наһанай охиндо абтажа, хэбэд номхон Хэжэнгын яһала сэбэрхэн басагантай танилсажа, сүлөө сагтаа хотын сэсэрлиг, кафе, кино руу харгылдаг болобод. 

Нэгэтэ Дамба тэрэ басагаяа абаад, «Прогресс» кинотеатрта кино харая гэжэ зорюута хойгуурхи һуурида билет абаба. Хүн зоншье олон бэшэ, энэ кино хэдэн үдэр харуулжа байгаа. Эдэ хоёрнай хаража эхилээ ааб даа. Теэд хүбүүнэй зүрхэн шангаар сохилжо, бүхы элшэ хүсэниинь газаашаа халижа байгаа ёһотой. Яахаб даа, бүхы юумэнэй халихада, басагаяа тэбэреэ, таалаа ааб даа. Эндэ тэндэнь аһалдахадань, шанга һургаалтай, жэнхэни буряад заншалаа табяагүй, аба эжынгээ үгөөр сэхэ һанаатай басаган тэсэжэ ядаад, шангаханаар хэлэбэ:

- Бү нохойро! 

Хэжэнгынхидэй энэ үгэ хараалай үгэ болоно. Ондоо аймагуудта иигэжэ хэлэдэггүй. Хүбүүн “Бү нохойро” гүүлээд гайхажа, урдаһаань түргэн харюу үгэхэдөө: 

- Бү хөөшхэтэ! – гэжэрхибэ.