958
Буряад Уласай Соёлой яаманай дэмжэлгээр Байгалай “Baikal Dance Fest” гэһэн хатарай түрүүшын фестиваль 2017 оной августын дүрбэндэ Г. Ц. Цыдынжаповай нэрэмжэтэ Оперо болон баледэй театрта үнгэргэгдэхэ юм.
Фестивалиин хэмжээндэ Ородой Холбоото Уласай арадай артист Андрис Лиепа баледэй ододой хабаадалгатай 2 таһагтай гала-концерт харуулха. Буряадай баледэй һургуулиин нэрэ холо ойруур суурхуулһан үндэһэтэнэй болон уласхоорондын хатарай мүрысөөнүүдэй лауреадууд болон дипломантнууд тоглолотодо хабаадаха юм. Нэрлэбэл, Иван Оскорбин, Трофим Маланов (Мариинска театрай хатаршад), Павел Окунев, Алёна Именхоева (“Балет Москва” театр), Баир Тайбинов (“Universal Ballet” Солонгос), Дансаран Ванданов (Словакиин Үндэһэтэнэй театр), Лия Балданова, Баир Жамбалов, Булыт Раднаев, Анастасия Цыбенова (Буряадай Оперо болон баледэй театр).
- Буряад Уласай омогорхол болоһон баледэй хатаршад “Baikal Dance Fest” фестивалиин хэмжээндэ үнгэргэгдэхэ тоглолтодо хабаадажа, баледэй урлагай һайндэр нютагаархидтаа бэлэглэхэ юм, - гэжэ фестиваль эмхидхэгшэд хэлэнэ.
Андрис Лиепа - баледэй суута хатаршан, найруулагша, продюсер, “Русские сезоны XXI века” гэһэн түсэл зохёогшо, хатарай урлаг дэмжэдэг Марис Лиепын нэрэмжэтэ буян үйлэдэлгын жасын түрүүлэгшэ юм.
Facebook хуудаһанһаа гэрэл зураг абтаба.
