​Эшэхэеэ яанаш!

Шэбэртымнай һургуулида тоо бодолгын багша Феодора Алексеевна олон жэлдэ хүдэлһэн, ехэ дүй дүршэлтэй бэрхэ багша байһан. Заалгаһан һурагшадайнь олонхинь тоо бодолгын багша болоһон юм. 

Ёндон Цыбикович, Феодора Алексеевна хоёрой одхон Булад һургуулияа һайнаар дүүргээд, Буряадай гүрэнэй багшанарай дээдэ һургуулиин тоо бодолгын таһагай оюутан болобо. Хамтын байрада Цыбиков Булад нэгэ таһалгада Хурамхаанай Аргатын Дабаев Гуржабтай байха болоо. 

Дээдэ һургуулиин тоо бодолгын таһагта һурахада, яһала хүндэхэн даабаринууд үгтэнэ. Булад Гуржаб хоёр тоо бодолгоороо ядалдабад. Буладынь Гуржабтаа: 

- Би энээниие баабайһаа һурахамни, намда даабариимни хэлсэг, - гэбэ. Гуржабынь: 

- Баабайшни шадаха юм гү? – гэжэ гайхаба. Буладынь:

- Юундэ шадахагүй юм, баабаймни хуу шадаха! – гэжэ омогорхобо.

- Баабайшни юу хэдэг юм? - гэжэ нүгөөдэнь бүри гайхаба.

- Зүүн Сибириин технологическа дээдэ һургуулиин аха курсын оюутан юм, - гэбэ Булад. 

- Мүнөө болотор һуража байдаг юм гү? - гэжэ Гуржабынь гайхаад, - баабайдаа бодуулхаяа эшэхэеэ яанаш! - гэжэ нүхэрөө зэмэлбэ. 

Эдэ хоёрой ойлголсоогүй ушар гэхэдэ, Буладай Светлана эгэшэнь Зүүн Сибириин технологическа дээдэ һургуулиин ахамад курсын оюутан байгаа. Бэсүүрэй буряадууд эгэшэеэ баабай гэдэг, бэшэ олон аймагуудта эсэгэеэ баабай гэдэг. Һүүлдэнь бэе бэеэ ойлголсоо ааб даа. 

Эндэ хэлэхэеэ һананаб: 

- Өөрынгөө нютаг хэлэн дээрэ хөөрэлдэхэдэ хэды һайншье һаань, бүгэдэ буряадуудайнгаа ойлгохо бэшэгэй хэлэеэ мэдэжэ ябаял даа.