1165
Байгша оной августын 27-һоо октябриин 15 болотор Буряадай гүрэнэй цирк Хабаровск хото гастрольдо гараха юм.
Тэдэнэр “Байгалай домогууд” гэһэн программа бэлдэжэ, үндэһэн арадайнгаа костюмуудые үмдэжэ, шэдитэ геройнууд болон харагшадые һонирхуулха юм. Нүүдэлшэ арадай абари зан, үндэһэн хүгжэмэй аялга, циркын зүжэгшэдэй бэлиг шадабари ямаршье наһанай хүнүүдэй зүрхэ сэдьхэл доһолгохо.
- Гастрольдо гарахадаа, циркын 19-дэхи хаһаяа эхилхэбди. Тиихэдээ бидэнэр ганса тоглолтонуудые харуулха бэшэ, харин һургуулиин шабинарта зорюулжа, мастер-классуудые үнгэргэхэбди. Мастер-классуудай ашаар, үхибүүд өөрынгөө һанал бодолоо дамжуулжа һураха, саашадаа циркын зүжэгшэнэй мэргэжэлшье шэлэхэ талаар түрүүшын алхамууд хэгдэхэ, - гэжэ циркын уран һайханай хүтэлбэрилэгшэ Туяна Догданова хэлэбэ.
“Һүүлэй хэдэн жэлнүүдтэ иимэ удаан болзорто гастрольдо гараагүйбди. Хабаровскын циркын захирал хоёр талада аша үрэтэйгөөр суг ажал ябуулха тухай дурадхал оруулжа, бидэ тэрэнииень дэмжэһэн байнабди. Тиихэдэ Хабаровск хотын ажаһуугшад “Шэнэ автомашина 3500 түхэригөөр” гэһэн акцида хабаадаха аргатай. Августын 1-һээ октябриин 15 болотор “Байгалай домогууд” гэһэн тоглолтодо 3500 түхэригэй билет худалдажа абабал, ажаһуугшад автомашина шүүхэ арга боломжодо хүртэхэ юм”, - гэжэ Буряадай гүрэнэй циркын захирал Наталья Борисова тэмдэглэбэ.
