1094
Г.Ц. Цыдынжаповай нэрэмжэтэ Буряадай гүрэнэй академическэ оперо болон баледэй театр сентябриин 13-да театрай 78-дахи хаһаяа эхилхэнь.
Энэ үдэшэ Буряадай оперо болон баледэй театрай тайзан дээрэ Жорж Бизе гэһэн хүгжэм найруулагшын «Кармен» оперо табигдаха. Энэ оперо театрай уран һайханай хүтэлбэрилэгшэ Юрий Лаптев найруулһан байна. Француз хэлэн дээрэ табигдаһан оперын премьерэ 2016 оной майн 23-да болоо һэн гэжэ һануулнабди.
Буряад Уласай ажаһуугшад анха түрүүшынхиеэ Гомбо Цыдынжаповай найруулһан «Кармен» оперо 1949 ондо шагнаһан түүхэтэй. Саашадаа суута оперодо Буряадай элитэ зүжэгшэд ялас гэмээр хабаадажа, олоной зүрхэ сэдьхэл доһолгожо шадаһан юм. Нэрлэбэл, СССР-эй арадай артист Дугаржап Дашиев, Ородой Холбоото Уласай габьяата артист, М. Глинкиин нэрэмжэтэ Бүгэдэ союзай мүрысөөнэй лауреат Ольга Аюрова гэгшэд Хозе Кармен хоёрой рольдо олон жэлдэ наадажа, олоной һайхашаалда хүртэһэн байна.
Жорж Бизе 1847 ондо «Кармен» оперо дээрэ хүдэлжэ эхилһэн намтартай. Француз уран зохёолшо Проспер Мериме гэгшын зохёолоор дэлхэйдэ мэдээжэ оперо тэрэ найруулһан юм.
