​Шаргалжан буряадуудай толи хэблэгдэбэ

Ородой Холбоото Уласай Буддын шажанай заншалта Сангха шаргалжан буряадуудай буряад-ород толи хэблэлдэ бэлдэбэ.

Буряад хэлэнэй юһэн нютаг хэлэнүүд дээрэ хэблэгдэхэ буряад-ород толинуудай дунда шаргалжан буряадуудай толи эгээл түрүүн хэблэгдэбэ. Буряад арадай нютаг хэлэнүүдые хүгжөөхэ түсэлдэ «Просвещение» гэһэн хэблэлэй байшан хабаадалсаа.

«400-гаад жэлэй туршада  манай угсаата арад энэ хэлэн дээрэ хөөрэлдэжэ, сахижа ябаа. Шаргалжан нютаг хэлэн бидэндэ ехэ сэнтэй, удха шанартай юм. Зуун жэлэй үнгэрөөд байхада, манай үри һадаһад нютаг хэлэн дээрээ хөөрэлдэһөөр байха. Өөрын нютаг хэлэнэй толи хүдөө нютагуудта байха ёһотой, саашадаа буряад нютаг хэлэнүүд хүгжэжэл байха гэжэ найданаб», - гэжэ Пандида Хамба лама Дамба Аюшеев хэлэбэ.

Үшөө 2014 ондо буряад-ород толи хэблэхэ тухай бодолдо абтажа, тэрэниие суглуулха, бүрилдүүлхэ талаар ажал ябуулагдаа. «Просвещение» хэблэлэй байшанай ашаар энэ толи хэблэгдэһэн байна. Тэдэнэр өөдынгөө мүнгөөр энэ ном гаргаа гэжэ Дамба Аюшеев тэмдэглэбэ.

«Манай юрэнхылэгшэ Владимир Узунай зүгһөө баяр хүргэнэб. «Просвещение» хэблэлэй байшан Буряад Уластай үнинэй холбоо харилсатай юм гэжэ һануулнаб. Буддын шажантанай заншалта Сангха болон Хамба лама Дамба Аюшеев толи зохёогшодой бүлэг байгуулжа, хэлэ шудалагшадтай хамта толи суглуулгын ажал эмхидхэһэн байна. Тиигэжэ жэншэдгүй нарин ажал ябуулагдаһанай удаа, шаргалжан буряадуудай толи хэблэлдэ гараба. Саашадаа буряад арадта аша туһатай хэрэг үргэлжэлүүлэгдэжэ, үшөө толинууд хэблэгдэхэ гэжэ найданабди», - гэжэ «Просвещение» хэблэлэй байшанай Санкт-Петербургын таһагай захирал Сергей Зубов хэлэбэ. 

Анна Огороднигой гэрэл зурагууд