1013
Бүхэроссиин «Киношок» гэһэн кинофестиваль Анапада сентябриин 3-һаа 9 болотор үнгэргэгдэхэ юм.
Бүхэроссиин кинофильмнүүдэй мүрысөөндэ түрүүшынхиеэ буряад фильмнүүд хабаадаха. Нэрлэбэл, «Байкальские каникулы 2.0», «Стоп! Снято! На Байкал!», «Зачётная весна» гэһэн сериал болоно.
- Түрүүн ганса «Зачётная весна» сериал мүрысөөндэ хабаадаха гэжэ хэлэгдэһэн байгаа. Удаань фестиваль эмхидхэгшэдтэ үшөө хоёр буряад кино һайхашаагдаа. Энэ хэмжээ ябуулгада хабаадаха болоһондоо бидэ ехэ баяртайбди, - гэжэ «AsisFilms» кинокомпаниин захирал Артём Бурлов хэлэбэ.
Буряад Уласай түлөөлэгшэд фестивальда хабаадагшадта нютаг, ёһо заншал хөөрэжэ, уластаяа олониие танилсуулха юм.
«Киношок» гэһэн кинофестиваль 1992 онһоо хойшо Анапада үнгэргэгдэдэг түүхэтэй. Анхан СНГ, Латви, Эстони, Литва гүрэнүүдые нэгэдүүлхэ зорилготой энэ хэмжээ ябуулга эмхидхэгдэдэг һаа, мүнөө Ородой Холбоото Уласай дэбисхэртэ буулгагдаһан кинофильмнүүд мүрысөөндэ хабаадаха юм.
Светлана Немоляева, Дмитрий Дюжев, Валерия Ланская, Ивар Калныньш, Юрий Стоянов, Сергей Шустицкий, Светлана Тома, Ирина Медведева, Ольга Прокофьева, Аристарх Ливанов болон бусад фестивальда айлшаар бууха. Найруулагша Александр Прошкин фестивалиин жюриин түрүүлэгшэ болохо юм.
