​Арадуудай урлагай үзэсхэлэн

Сентябриин 6-да Улаан-Үдын Ленинэй гудамжаар оршодог 42-дохи байшанда Ази түбиин арадуудай урлигай үзэсхэлэн бултанда мэдээжэ Валерий Доржиевай басаган Светлана Доржиевагай хүсэл оролдолгоор нээгдээ.

Энэмнай анхан Ивалгын дасанда 2016 ондо дэлгэгдэһэн үзэсхэлэн мүнөө үшөө баян болгогдобо. Тиимэһээ олон зон энэ үзэсхэлэн хараха, эндэ дэлгэгдэһэн бүтээлнүүдые худалдан абаха аргатай болобо.

Үзэсхэлэндэ дэлгэгдэһэн “Эрхим дархан” бүлгэмдэ хүрэл, модон, шулуугаар бүтээгдэһэн урлалнууд юрын бэшэ. Лама багшанарай адислаһан эдэ уран бүтээлнүүд өөрын онсо гүнзэгы удхатай. Зүйл бүхэн һайн һайханиие, боди сэдьхэл түрүүлһэн, гүн ухаа гэгээрүүлһэн, элүүр энхэ, амар амгалан, үлзы хутаг хүсэнэ.

Бурхадай, бодисаданарай хүрэгүүд заншалта ёһоор бүтээгдэнхэй. Этигэлэй хамбын хүрэл хүрэг заншалта бадма лёнхобын дэльбэнүүд дээрэ бэшэ, харин субаргын маягтайгаар модонһоо бүтээгдэһэн һууритай хадаа гансата анхарал татана.

Буряад-монголшуудай эгээл үндэрөөр сэгнэдэг морин эрдэни олон янзаар бүтээгдэһэн байна. Заншалта Хии моринһоо гадуур Гал мориной хүрэг һонирхол түрүүлнэ. 12 жэлэй литын болон Шара замай ододые тэмдэглэһэн амитад (знаки зодиака) уран гоёор бүтээгдэжэ, дура буляана. Тахяа жэлэй хүрэгүүд олон ондоогоор бүтээгдэнхэй.

Хүлэг моритойшуул, һур харбагшад, бүхэ барилдаашад, һэершэд, шатаршад харагшадай анхарал татана.

Бүхы бүтээлнүүд буряад угсаатанай, буддын шажантанай сэдьхэлдэ дүтэ, гүн удхатай гэжэ ойлгогдоно. Жэшээлхэдэ, “Талын хатан” гэһэн хатан хүрэг гүнзэгы удхатай: үлгэн дэлхэйе тэмдэглэһэн яһан хушалтата мэлхэйн нюрган дээрэ зогсоһон эхэнэрэй үһэниинь заншалта ёһоороо хубаагдахадаа, мориной түхэлтэй болошоно. Тиихэдэ манай заншалта хоол – буузашье уран гоёор бүтээгдээд байхадаа, үнэр баян, элбэг дэлбэг байдал тэмдэглэнэ.

Анна Огороднигой гэрэл зураг.