908
Х. Намсараевай нэрэмжэдэй буряад драмын театрта үсэгэлдэр «Нүүдэлшын зам» гэһэн Уласхоорондын хүүхэлдэйн театрнуудай фестиваль хаалгын баяр ёһолол үнгэргэгдэбэ.
Хэмжээ ябуулга эмхидхэгшэдэй хэлэһээр, Буряад уласай аймагууд болон Улаан-Үдэдэ табигдаһан зүжэгүүдые 4 мянганһаа дээшэ хүн хараһан байна. Тыва уласай хүүхэлдэйн театрай залуу зүжэгшэд эрхим театр гэһэн нэрэ зэргэдэ хүртэжэ, фестивалиин гол шанда хүртэбэ.
Байгша ондо Буряад уласай хүүхэлдэйн «Үльгэр» театрай 50 жэлэй ойн баяр угталгын хэмжээ ябуулгануудта Железногорск, Братск, Шэтэ, Казань, Санкт-Петербург, Нерюнгри, Кызыл хотонуудай болон Монгол, Япон, Хитад гүрэнүүдэй хүүүхэлдэйн театрнууд хабаадалсаа.
«Үльгэр» театрай хүдэлмэрилэгшэдые гүрэнэй шангуудаар шагнажа, баярай үгэнүүдые Буряад Уласай Толгойлогшын уялга дүүргэгшэ Алексей Цыденов хэлэбэ.
«Гансашье хүүгэдтэ бэшэ, харин томошуулдашье баяр бэлэглэнэт. Энэ ажалтнай сэгнэшэгүй. Мүнөө үедэ компьютер болон бусад хэрэгсэлнүүдэй хүгжөөшье һаань, таанар хүнүүдэй сэдьхэлэй хүбшэргэйнүүдые дайража, онтохоной оршон бэлэглэнэт. Хододоо иимэ байг лэ», - гэжэ тэрэ тэмдэглэбэ.
«Нүүдэлшын зам» мүрысөөнэй шүүгшэдэй түрүүлэгшэ, Ородой Холбоото Уласай театрай ажаябуулагшадай эблэлэй гэшүүн Давид Бурман «Эрхим зүжэг» гэһэн номинациин илагшада шан барюулба.
«Бидэ албанай ёһоор олон тоото зүжэгүүдые харадагбди. Тиимэһээ фестивальда хабаадахадаа, урид хараһан зүжэг тухайгаа мартаха шухала.Энэ фестивалиин һүлдэ морин эрдэни бидэнэрые нүүдэлшын замда гаргажа нэгэдүүлээ. Фестивалиин гурбан гол шангууд нүүдэлшын замтай нягта холбоотой. Мүнөө зуун жэлэй түүхэдэ нэрэеэ бэшүүлһэн, Тыва уласай хүүхэлдэйн театрта гол шан барюулнаб» – гэжэ Давид Бурман хэлэбэ.
Эрхим найруулгын түлөө «Маленькая история о большой мечте» гэһэн зүжэг табиһан Братск хотын «Тирлямы» театр шагнагдаба.«Эрхим сценографи» номинацида «Сайн эрэ. Һалхинтай сугтаа» гэһэн зүжэг табиһан «Үльгэр» театр шагнагдаба.
Хүүхэлдэйн театрай түүхэшэн, шүүмжэлэгшэ, Варшавын театрай ехэ һургуулиин философиин доктор, профессор Польшо гүрэнэй Марек Вашкель болон Ород гүрэнэй «Алтан баг» гэһэн үндэһэтэнэй шангай мэргэжэлтэ шүүбэришэдэй зүблэлэй гэшүүн, театрай шүүмжэлэгшэ, соёл урлаг шудалалгын кандидат Анна Константинова гэгшэд фестивалиин шүүгшэд болоһон байна.
Табан үдэрэй туршада Улаан-Үдэ хото хүүхэлдэйн театрнуудай зүжэгүүдые хараһан байна. Буряад Уласай Мухаршэбэр, Сэлэнгэ болон Загарай аймагуудта зүжэгүүд табигдаа.
«Табан жэлэй нэгэ дахин фестиваль үнгэргэгдэнэ. Энэ хэмжээ ябуулгын оло дахин үнгэргэгдэдэг һаань, һайшаалтай. Фестиваль һайнаар үнгэргэгдэбэ», - гэжэ Анна Константинова хэлэбэ.
«Үльгэр» театр 1967 ондо баайгуулагдаһан гэжэ һануулнабди. Театрта жэл бүри шахуу шэнэ зүжэгүүдые табижа, тэдэнэй репертуарта 50-һаа дээшэ зүжэгүүд табигдаһан байха юм. «Үльгэр» театр дүрбэ дахин «Алтан баг» шангай лауреат болоһон байна.
Буряад Уласай Соёлой яаманай сайтһаа гэрэл зураг абтаба.
