974
Буряад Уласай Үндэһэтэнэй музей Усть-Ордагай тойрогой Үндэһэтэнэй музей болон Усть-Ордагай Үндэһэтэнэй түбтэй хамта уран зураашад болон уран гартанай бүтээлнүүдэй үзэсхэлэн сентябриин 28-һаа Улаан-Үдэдэ түрүүшынхиеэ эмхидхэнэ.
Адуунай үһөөр бүтээһэн шэгэдхэмэл оёдолтой хүшэгэ, ханын зураг, һэеы болон арһаар хэгдэһэн скульптуранууд, байгаалиин зүйлнүүдһээ хэгдэһэн бүтээлнүүд, уран зураг, графика болон зурагай элдэб техникын зурагууд олоной һонирхолдо дурадхагдаха.
– Арадай сэсэн, мэргэн үльгэрнүүд, шэдитэ уг гарбал, хүхэ мүнхэ тэнгэридэ хандажа, уран зураашад, уран гартан ажалаа бүтээнэ. Угсаата арадайнгаа соёл түүхэ шэнжэлһэн бэлиг талаантай зохёогшод Байгалай баруун талын буряадуудай уран бүтээлнүүдэй өөрсэ маяг ажалнуудтань харуулагданхай, - гэжэ үзэсхэлэн эмхидхэгшэд хөөрэнэ.
Усть-Ордагай Буряадай тойрогой түүхэ, соёл болон уран зохёолшодой, уран зураашадай зохёохы зам, туйлалтанууд тухай харуулха гэжэ түсэблэгдэнхэй. Тиихэдэ үзэсхэлэндэ түүхэ болон буряад соёлой урлаг тухай номуудые, буряяад шэмэглэл, түмэр үйлэдбэри, буряад арадай заншалта хубсаһан тухай методическа заабаринуудые, сувенирнүүдые худалдажа абахаар юм.
