1271
«Ородой Холбоото Уласай уран зураашадай холбоон» гэһэн Бүхэроссиин зохёохы олониитын эмхиин Буряадтахи таһаг «Баргажан Түхэм -2017» гэһэн уран зураашадай суглаа сентябриин 25-һаа октябриин 2 болотор Байгал далайн эрьедэ эмхидхэнэ.
Ородой Холбоото Уласта 2017 он – байгаали хамгаалгын жэл гэжэ соносхогдонхой. Тиимэһээ байгаали хамгаалгын асуудалнуудта анхарал хандуулха зорилготой хэмжээ ябуулгада Ородой, Хитадай болон Монголой дүшөөд гаран уран зураашад хабаадаха юм. Тэдэнэй тоодо Буряад Уласай мэдээжэ Бальжинима Доржиев, Владимир Поспелов, Баясхалан Лыксоков болон Жамсо Раднаев, Красноярск хотын – Михаил Бирюков, Леонид Кузнецов, Арсений Милованов, Хитад-Ород зурагай урлалай академиин юрэнхылэгшэ Фу Цзяожэнь, Хитадай мэдээжэ уран бэлигтэн Ли Пейжэнь, Ву Цинжун, Ван Гебин, Ву Цинжао, Мияо Хонг, Монголой уран зураашадай холбооной түрүүлэгшэ Пунцаг Цэгмид, гэшүүд – Содном Төгс-Оюун, Амгаланбаатар Сонинбаяр, Батмонх Долгорсүрэн, Сүхбат Шүрэнцэцэг, Цэдэнпил Оюун-Эрдэнэ, Цэнд-Очир Бямбажав гэгшэд болоно.
Мэдээжэ уран зураашадтай хамта Буряад Уласай Зүүн Сибириин гүрэнэй соёлой ехэ һургуулиин болон П.И. Чайковскиин нэрэмжэтэ урлагай колледжын, Хакас уласай болон Владивосток хотын оюутад хэмжээ ябуулгада хабаадаха юм.
–– «Баргажан Түхэм -2017» гэһэн хэмжээ ябуулгын хүсөөр Байгалай можын байгаалиин баялиг уран зурагай хүсөөр харуулжа, тэрэниие аршалха, хамгаалха хэрэгтэй гэжэ дамжуулха зорилгонуудай нэгэн болоно. Энэ хэмжээ ябуулгада хабаадагшад Буряад Уласай баялиг хаража, сэгнэжэ, олондо хөөрэхэ, харуулха аргатай, - гэжэ хэмжээ ябуулга эмхидхэгшэд тэмдэглэнэ.
Уласхоорондын суглаанай хэмжээндэ нүүдэл үзэсхэлэн, дүхэриг шэрээ болон пресс-конференци үнгэргэгдэхэ.
Буряад Уласай Соёлой яаманай сайтһаа гэрэл зураг абтаба.
