867
Улаан-Үдэ хотодо ажаһуудаг, мүн айлшаар бууһан уншагшадые сентябриин 29-дэ урина. Энэ жэлдэ номой дугуйлан нэгэн доро хоёр газарта – Үндэһэтэнэй номой санда, мүн Ленинэй гудамжын 37-дохи байшанда һая нээгдэһэн худалдаа наймаанай «Форум» гэжэ түбтэ – болохо байна.
Номуудай үзэсхэлэн-яармаг сентябриин 29-дэ үдын 12 сагта хүдэлмэриеэ эхилхэ. Тэрэниие нээлгын баяр ёһолол үдэшын 16 сагта үнгэргэгдэхэ юм. Үргэн олониитэдэ мэдээжэ болоһон номуудай авторнууд, ном гаргадаг хэблэлнүүд олондо туһатай һонин-һонин номуудаа уншагшадта дурадхаха байна.
Номой яармагта 10 хэблэл, ном наймаалдаг табан дэлгүүр, 2 сонинуудай редакци хабаадаха юм. Уран һайханай, хизаар ороноо шэнжэлэлгын, хүүгэдтэ зорюулагдаһан зохёолнууд ородшье, буряадшье хэлэн дээрэ дурадхагдаха байна. Дүн хамта 1500 номуудтай танилсалга болохо. Улаан-Үдэ хотодо ном худалдадаг дэлгүүрнүүд номой дугуйланай үедэ үнэ сэнгүүдээ унагааха. Яармагта хабаадахаяа ерэһэн хүн бүхэн өөрынгөө дуратай уран зохёолшын моторлоhон ном абаха аргатай байха.
«2017 оной эрхим ном» гэжэ Буряад Уласай урилдаанда дурадхагдаһан номуудhаа гадна 1996 онһоо эхилээд, 2016 он болотор иимэ конкурснуудта шалгарһан номууд уншагшадта дурадхагдаха. Уран зохёолшод энэ жэлдэ бэшэжэ, хэблэлдэ гаргаһан номуудтаяа танилсуулха. Уншагшадай мэдэсэ элирүүлдэг һонин-һонин мүрысөөнүүд болохо. Зохёол бэшэжэ һурадаг һайб гэжэ хүсэдэг бэлигтэнтэй уран зохёолшод хэшээл үнгэргэхэ гэжэ түсэблэгдэнэ.
Үндэһэтэнэй номой санда багашуулда зорюулагдаhан талмайнууд ажаллаха. Тэндэ номтой танилсуулхын хажуугаар амяараа зохёол, тэрэнэй сэхэ болон далда удха тайлбарилһан һонин-һонин хөөрөөнүүд дэлгэгдэхэ.
Хүдөө нютагуудай номой сангуудые эрхилэгшэдтэ удха түгэлдэр хэшээлнүүдшье хараалагданхай.
Номой дугуйланай программа харахада, нэгэ үдэрэй туршада аяар 40 ондоо хэмжээ ябуулганууд үнгэргэгдэхэ байна. Тэдэнэй дүнгүүд удаадахи үдэрынь, сентябриин 30-да, соносхогдохо. «Жэлэй эрхим ном» гэhэн үндэр нэрэ зэргэдэ хүртэһэн номуудай авторнууд үнэтэ болон дурасхаалта бэлэгүүдээр урмашуулагдаха юм.
Автор: Баяр ЖИГМИТОВ
