​Номой XXII дугаар дугуйлан

Мүнөөдэр Үндэһэтэнэй номой санда Буряадай хэблэлнүүд һүүлэй үедэ хэблэн гаргаһан номуудаа дэлгэбэ.

Буряад Уласай уран зохёолшодой прозын, ирагуу найруулгын, багашуулда зорюулһан зохёолнуудай, хизаар ороноо шэнжэлэлгын ажалнуудай ородоор, буряадаар бэшэгдэһэн олон тоото номууд дэлгэгдэжэ, уншагшадай һонорто дурадхагдаа.

Номой XXII дугаар дугуйланай гол үйлэ хэрэгүүд һая нээгдэһэн зугаа нааданай-худалдаа наймаанай “Форум” түбтэ 16 сагта олоной хабаадалгатайгаар эхилхэ.

Архивай үзэсхэлэн

Номой санда Буряадай гүрэнэй архив болон Үндэһэтэнэй номой сангай хамта эмхидхэһэн архивай баялигуудай түрүүшын үзэсхэлэн мүнөөдэр дэлгэгдэбэ. Соёлой сайдай уялгануудые дүүргэгшэ Тимур Цыбиков амаршалгын үгэнүүдые хэлэхэдээ, архивай болон номой сангай ажалшадай хамтын ябуулга ехэтэ дэмжэжэ байһанаа онсолон тэмдэглээ. Үндэһэтэнэй номой сангай захирал Людмила Гармаева гүрэнэй архивтай эб хамта ажалаа ябуулһандаа омогорхоно. Ородой Холбоото Уласай түүхэшэдэй, архивистнуудай Буряадай бүлгэмэй түрүүлэгшэ, түүхын эрдэмэй кандидат, Олон зоной Үндэһэтэнэй номой санда үзэсхэлэнэй дэлгэгдэһэндэ Зүүн Сибириин гүрэнэй соёл, урлагай ехэ һургуулиин доцент Евгений Семёнов баяртай байһанаа мэдүүлээ.

Дээдэ-Үдэ хтодо ажаһууһан мэдээжэ Михаил Екатерина Танскийнуудай бүлын архив Буряадай гүрэнэй архивта 1980 ондо дамжуулагдаһан байна. Аяар 1869 онһоо бэшэгдэһэн бэшэгүүд, почтын баярай бэшэгүүд, гэрэл-зурагууд тодо аад, уран нарин найруулгаараа тон һонирхолтой. Тэрэ үеын Хаанта Россида ехэл түгшүүритэй байһан гэжэ мэдээжэ. Теэд энэрхы сэдьхэлтэй сэхээтэн хүнүүд ямаршье сагта өөртөө үнэн сэхэ, дүтынгөө зондо илдамаар хандаха, амаршалха, сэдьхэлэйнгээ бодолые хубаалдаха һайхан заншалаа сахидаг байгаа гэжэ гэршэлнэ.

Сэнгэ Ринчиновай гэрэл зураг.