​Шэнэ номтой танилсалга

Байгша оной сентябриин 29-дэ Буряад Уласай Үндэһэтэнэй номой санда XXII дугаар дугуйланай хэмжээндэ Д.ГДымбилова – Юндуновагай «Хэбэд номхон Хэжэнгэ талын урлал болон соёл» гэһэн номтой танилсалга үнгэргэгдэбэ.

Ородой Холбоото Уласай, Буряад Уласай соёл урлагай түүхэдэ хубитаяа оруулһан, Алма-Ата, Ленинград, Новосибирскын консерваторинуудта, Красноярскын соёл урлагай дээдэ һургуулида, Буряад Уласай соёлой һургуулинуудта һураһан 52 хүнүүд тухай энэ ном соо хэлэгдэнэ. Тиихэдэ соёлой 27хүдэлмэрилэгшэд болон 7 хүгжэм найруулагша, мүн лэ Хэжэнгэ нютагай арадай театр, арадай хоор «Ургы», Жигжит Батуевай нэрэмжэтэ Хүүгэдэй хүгжэмэй һургуули тухай ном соо дурдагдана. Үнгэтэ гоё, Хэжэнгын бүхы мэдээжэ соёлой 350 хүдэлмэрилэгшэдэй гэрэл зурагуудтай ном 200 экземпляр хэблэгдэжэ гараа. Тус хэмжээ ябуулгада Хэжэнгэ нютагһаа гарбалтай соёлой һалбарида хүдэлдэг мэдээжэ зон сугларжа, нютагай одо заяатай зүжэгшэн, дуушад, соёлой хүдэлмэрилэгшэд нэгэ ном соо бэшэгдэжэ хэблэгдэһэндэнь баяраа хүргэбэ.

-Энэ ном Хэжэнгын арад зоной, соёлой хүдэлмэрилэгшэдэй урлалай талаар ажал хэрэгынь үшөөшье дэмжэн урагшатай байха, мүн тиихэдэ арадай аман зохёолой бүлгэмүүд тухай удаадахи номдо бэшэгдэхэ,- гэжэ Дарима Гывановна Дымбилова найдуулна.