1193
Үнгэрһэн амаралтын үдэрнүүдтэ Улаан-Үдэдэ Үндэһэтэнэй номой санда болон худалдаа-найманай «Форум» түбтэ Номой XXII дугаар дугуйлан үнгэргэгдэбэ.
Хоёр үдэрэй туршада хэблэгдэн гаргагдаһан 32 номуудтай танилсалга болон бусад хэмжээ ябуулганууд олон зоной хабаадалгатайгаар эмхидхэгдэбэ. Тиихэдэ 14 хэблэлэй байшангууд болон ном худалдадаг дүрбэн эмхинүүд энэ хэмжээ ябуулгада хабаадалсаба.
«Эрхүү можо, Үбэр Байгалай хизаар болон бусад можо нютагуудһаа айлшад, хабаадагшад номой яармагта ерэһэн байна. Олон зониие нэгэдүүлдэг, ухаан бодолдо нүлөөлдэг номууд ехэ удха шанартай. Ном зохёогшод энэ хэмжээ ябуулгада шухала һуури эзэлнэ», – гэжэ Буряад Уласай Соёлой сайдай тушаалда хүдэлһэн Тимур Цыбиков тэмдэглэбэ.
Тэрэнэй хэлэһээр, Буряад Уласай ажабайдалай соёлой һалбарида «Номой дугуйлан» эгээл һонирхолтой, ялас гэмэ хэмжээ ябуулганууудай нэгэн болоно.
Жэл бүри уран зохёолшод, ном хэблэгшэд, ном наймаалдаг эмхинүүд хэһэн ажалтаяа арад түмэнөө танилсуулха арга боломжотой болоно. Уншагшад энэ хэмжээ ябуулгын үедэ ном зохёгшодтой хөөрэлдэхэ, һаналаа хубаалдаха, шэнэ номуудтай танилсаха, мүрысөөн, викторина болон мастер-классуудта хабаадаха аргатай.
Тиихэдэ уран һайханай, хүүгэдтэ зорюулагдаһан, болбосоролой, эрдэмэй, хизаар ороноо шэнжэлэлгын болон бусад һонирхоһон номуудаа «Номой дугуйланда» хямда сэнгээр худалдан абахаар байгаа. Эдэ номууд ород, буряад хэлэнүүд дээрэ хэблэгдэн гараһан байна.
Яармагай гол үйлэ хэрэгүүдэй нэгэн хадаа Дамба Аюшеев тухай «Хамбо лама. Мысли наедине» гэһэн номтой танилсалга болобо. Энэ ном хадаа Дамба Аюшеевай хэлэһэн, хадуугдаһан үгэнүүд, тэмдэглэлнүүдэй суглуубари болоно. Тус суглуубари «Буряад Үнэн» хэблэлэй байшанай захиралай орлогшо Александр Махачкеев бэлдэһэн байна. Буряад Уласай Толгойлогшо Алексей Цыденов хубиин номой сандаа энэ ном абаба.
«Номой дугуйланай» үедэ «Буряадай заншалта хубсаһан» гэһэн гэрэл зурагуудай альбомтой танилсалга үнгэргэгдөө. Үбэр Байгалай арадуудай угсаата зүйн музей энэ хэмжээ ябуулгын үедэ заншалта хубсаһанай харалга эмхидхэжэ, олоной һонирхол татаба. Энэ альбом «2017 оной эрхим ном» гэһэн уласай мүрысөөндэ түрүүлбэ.
«Хэблэлэй байшанай үйлэдбэриин эрхим хүдэлмэри» гэһэн мүрысөөндэ «Летопись города Улан-Удэ» ном мүнгэн шанда хүртэбэ. «Буряад хэлэн дээрэ хэблэгдэһэн эрхим ном» мүрысөөндэ Дулгар Доржиевагай бэшэһэн «Эрхэтэн ябаха үйлэмнай » гэһэн ном түрүүлбэ.
Буряадай гүрэнэй дээдэ һургуулида «Үхибүүдтэ болон эдиршүүлдэ зорюулагдаһан эрхим ном» номинацида «Писатели Бурятии: литературные биографии» гэһэн ном хэблэгдэн гараһан байна. «Үхибүүд болон эдиршүүлдэ зорюулагдаһан эрхим ном» мүрысөөндэ Наталья Красниковагай «Новогодняя сказка» гэһэн ном түрүүлбэ.
Цырен-Ханды Дарибазаровагай «Герои Социалистического Труда сельского хозяйства Бурятии» гэһэн ном тусхай шанда хүртөө.
Жэлэй туршада номой сангай эгээл эдэбхитэй уншагша, һурагшадай эдеэ хоолой хотын комбинадай эдеэ шанагша Маргарита Гонгорова «Эрхим уншагша» гэһэн шанда хүртэбэ.
«Буряад хэлэн дээрэ номуудые уншагша» гэһэн шанда «Байгал» журналай, Буряад Уласай Уран зохёолшодой ударидахы зургаанай харюусалгата секретарь Надежда Гармаева хүртэбэ.
уряад Уласай Соёлой болон Байгаалиин нөөсэнүүдэй яамануудта «Библиотека – информационно-ресурсный центр экологического туризма» гэһэн уласай мүрысөөнэй дүнгүүдые согсолбо. 
Тэрэнэй дүнгүүдээр Бабантын түбэй номой сан түрүүлбэ. Хоёрдохи һуури – Сэлэнгэ аймагай һомонуудай хоорондын түбэй номой сан, гурбадахи һуури – Ивалга аймагай һомонуудай хоорондын түбэй номой сан эзэлбэд.
Буряад Уласай Соёлой яаманай эмхидхэһэн байгаали хамгаалгын мүрысөөндэ Зэдэ аймагай һомонуудай хоорондын түбэй номой сан түрүүлбэ, хоёрдохи болон гурбадахи һууринуудта – Баргажан аймагай болон Захаамин аймагай һомонуудай хоорондын түбэй номой сангууд хүртэбэ.
Анна Огороднигой гэрэл зурагууд.
