863
Буряадай гүрэнэй циркын зүжэгшэд гастрольдо гаража, Саха (Яхад) уласай ажаһуугшадта баярай үдэшэнүүдые бэлэглэнэ.
Буряадай зүжэгшэд «Байгалай домогууд» гэһэн наада харуулаа. Үбгэн Байгалай басаган Ангара болон Енисей мүрэнүүдэй инаг дуран тухай хөөрэһэн домогто нүүдэлшэ арадай һүр һүлдэ, арадай хүгжэмэй зэбсэгүүдэй шэдитэ аялга, хүнүүдэй зүрхэ сэдьхэл доһолгомо эршэ хүсэн, зүжэгшэдэй залиршагүй бэлиг талаан, циркын һонирхолтой элдэб арганууд харагшадые тэдэнэртэй хамта үльгэрэй оршондо оруулна.
– Хоёр часай туршада бидэнэр зүжэгшэдтэй хамта Байгалай домогуудай оршондо байгаабди. Аргагүй бэлиг талаантай зүжэгшэд манадые баярлуулаа, хужарлуулаа, - гэжэ харагша Людмила Исакова хэлэбэ. Яхадай циркын танхимаар дүүрэн зон сугларжа, гоё һайхан наада хаража, удаан сагта нэрьемэ халуун альга ташалгаар зүжэгшэдтэ баяраа мэдүүлээ.
Буряадай гүрэнэй цирк Яхад уласта ноябриин 5 болотор гастрольдо ябаха.
Буряадай гүрэнэй циркын сайтһаа гэрэл зураг абтаба.
