​Үхибүүдые эблэрүүлһэн «Оюун бэлиг»

Улаан-Үдэ хотын 29-дэхи буряад гимназида юһэдэхи ангиин һурагшадай дунда уласай “Оюун бэлиг” гэһэн урилдаан уласай хэмжээндэ долоодохиёо үнгэрбэ. Мүн тиихэдэ Монголой Дархан хотын Монгол-Оюу һургуулитай уулзалга болоо. Буряад Уласай 11 һургуулиин, мүн Монгол-Оюу һургуулиин һурагшад энэ хэмжээ ябуулгада хабаадаа.

2014 онһоо эхиеэ абаһан “Оюун бэлиг” гэжэ урилдаан уласай хэмжээнэй һаа, ябан ошон уласхоорондын дэ­лисэтэйгээр үнгэргэгдэдэг болонхой. Буряад хэлэ­нэй габшагай һарын үедэ үнгэргэгдэдэг энэ хэмжээ ябуулга һургуулиин актова зал соо 12 һургуулиин шаби­нарые, айлшадые суглуулба.

Мүрысөөн угтамжын ха­тараар эхилжэ, удаань Бу­ряад Уласай Болбосоролой болон эрдэм ухаанай яама­най таһагай дарга Татьяна Елистратова, Улаан-Үдэ хо­тын болбосоролой хорооной методист Ульяна Мангутова, Улаан-Үдэ хотын нэгэдэхи лицей-интернадай захирал Булат Шойнжонов, «Монгол- Оюу» һургуулиин захирал Хумбагаа Золзаяа, 29-дэхи буряад гимназиин захирал Баир Ширапов гэгшэд амар­шалгын үгэнүүдые хэлэбэ.

Һурагшад хэдэн бүлгэм боложо хубаараад, “Түүхэ төөригдэхэгүй, уг орхидохогүй”, “Сахижа ябая!”, “Эр­хим бэлигтэй ударидагша”, “Эдир оршуулагша”, “Үеын нүхэд - үерэй хулһад” гэһэн шатануудые гараа. “Оюун бэлиг - ороной мүшэд” гэһэн гэрэй даабарияа ядамаргүй гаталаа.

Һургуулиин шабинар бүхэн булта гоё буряад хубсаһатай, түрэлхи буряад хэлэнэй баялигые дуугаар, шүлэгөөр, зүжэгөөр харуулха гэжэ оролдоо, тиигээшье һаа, зарим хотын һургуулинуудай һурагшад ахирхан бэ­лэдхэлтэй байна. Зүгөөр Улаан-Үдэ хотын 29-дэхи буряад гимназиин, Түнхэн аймагай Шэмхын, Хэжэнгын һургуули-интернадай, Хоца Намсараевай нэрэмжэтэ Хэ­жэнгын дунда һургуулиин, тиихэдэ Кабанскын Кор­саково һууринай дунда һургуулиин хүүгэдые онсо тэмдэглэхээр. Хүүгэдэй бэ­лиг шадабари хараһаар, шалгаһаар байтараа, һурагшад оршуулгын текстнүүдтэ ядалдана, зарим үгэнүүдэйнгээ удха хүсэд ойлгоногүй. Юундэб гэ­хэдэ, буряад уран зохёол ехээр уншанагүй гэжэ ада­глахаар. Тиибэшье талаан бэлигтэй хүүгэд баһал байха байна. Жэшээлхэдэ, Хэжэн­гын Хоца Намсараевай нэ­рэмжэтэ дунда һургуулиин Адиса Рампилова өөрынгөө зохёоһон шүлэг уншажа, бу­ряад арадай дуу гүйсэдхэжэ, бултаниие хужарлуулба, Улаан-Үдэ хотын 8-дахи һургуулиин Амгалан Нимбуев, Кабанскын аймагай Кор­саковын дунда һургуулиин һурагшад болохо Андрей Тынтуев Буянто Хонихоев хоёр зүжэгтэшье наадаха, дуушье дуулаха шадабари­тай гэжэ тэмдэглэмээр.

Урилдаанай дүнгүүдээр, нэгэдэхи һуурида “Заншал” бүлгэм, хоёрдохидо – “Ураг­шаа”, харин “Нэгэдэл” бүлгэм гурбадахи һуури эзэлээ. Гран-при шан “Ухаан” гэжэ бүлгэм абаа.

Энэ урилдаан үхибүүдые эблэрүүлнэ, бэе бэетэеэ саа- шадаа харилсажа баймаар хани барисаа тогтооно. Үшөө тиихэдэ үхибүүдэй буряад хэлыень ульгам болгооно, бэе бэеэ шүүмжэлжэ һургана бшуу. Эдиршүүлнай өөртөө аша туһатай һургаал заабари абана гээд, адаглахаар байба.

Түрүүшын һуури эзэлһэн «Заншал» бүлгэм

Хэжэнгын Хоца Намсараевай нэрэмжэтэ дунда һургуулиин Адиса Рампилова

Любовь ЦЫБЕНОВАГАЙ гэрэл зурагууд