​Улан шүлэгүүдээ үхибүүдтэ зорюулаа

Хори аймагай Ашанга нютагhаа гарбалтай СССР-эй Уран зохёолшодой холбооной гэшүүн, Буряад Уласай соёлой габьяата хүдэлмэрилэгшэ Эрдэни Дугаровтай уулзалга октябриин 18-да БГУ-гай наймадахи байшангай буряад уран зохёолой танхим соо үнгэрөө.

Буряад хэлэ үзэдэг «50+» гэһэн бүлэгэй хүтэлбэрилэгшэ Соёлма Цыбан-Доржиевна Ломпоева мэдээжэ ирагуу най­рагшатай харилсажа, зохёохы үдэшэ эмхидхэһэн болоно.

Буряадай гүрэнэй ехэ һургуулиин Зүүн зүгэй институдай доцент Лариса Халхарова энэ хэмжээ ябуулга хүтэлбэ. Уран зохёолшо Эрдэни Дугаров, наһанайнь нүхэр Дарима Доржи­евна, Бүгэдэ Буряадай соёл хүгжөөлгын үндэһэн эблэлэй гэшүүн, Буряад Уласай нютагаархинай эблэлэй түрүүлэгшэ Нина Дашиева олоной урда уригдаа һэн.

Уран шүлэгшын номууд, сэтгүүлнүүдтэ хэблэгдэһэн зо- хёолнууд олоной анхаралда дэлгээтэй байгаа.

Һургуулида һуража байхадаа, яажа шүлэг бэшэжэ эхилһэнээ, мүн бусад һонин ушарнуудые Эрдэни Чимитович сугларагшадта хөөрэбэ. Мүнөө сагта ном хэблүүлхэдэ мүнгэнэй талаар шахардуу байдаг. Тиимэһээ Буряад Уласай Соёлой яаман руу грант бэшэдэгээ, өөрынгөө пенсиеэ алмалжа, номуудаа хэблэдэгээ хэлэбэ.

Нютагайнгаа мэдээжэ ирагуу найрагшада дулаахан үгэнүүдые Нина Тожиловна зорюулаа. Удаань ВАРК-ын зүгһөө Эрдэни Дугаровта, мүн хабаадаһан һургуулинуудай түлөөлэгшэдтэ Баярай бэшэгүүдые барюулаа. Энэ үдэшэдэ хабаадаһан бүхы үхибүүдтэ Соёлма Цыбан-Доржиевна үнэмшэлгэнүүдые барюулан урмашуулаа.

Уран шүлэгшэ, Хориин 1-дэхи дунда һургуули дүүргэһэн Бата Зориктуев аха нүхэртөө баярые хүргөө.

Ирагуу найрагшые Эрдэни Дугаровта дурсалгын бэлэгүүдые, наһанайнь нүхэр Дарима Доржиевнада ба­глаа сэсэгүүдые нютагай аха захатанай зүгһөө Нина Дагбаева,буряад хэлэ наһатайшуулда заадаг Соёлма Цыбан-Доржиевна барюулаа.

Ивалгын, Хориин һургуулинуудай багшанар һурагшадаа дахуулжа асараа. Тэдэнэй шабинарынь, мүн баһа Улаан-Үдэ хотын һургуулиин һурагша Оюун – Эрдэни Дагбаева энэ үдэшэдэ хабаадажа, поэдэй шүлэгүүдые сээжээр, уран гоёор уншаһан байна.

Ирагуу найрагша Эрдэни Дугаров шүлэгөө уншажа, үдэшэдэ оролсогшодой асуудалнуудта харюусаа. Буряад хэлэ үзэдэг наһатайшуулай «50+» бүлэгтэ өөрынгөө прин­терээр гаргаһан номуудаа бэлэглээ. Хармаандаа хээд ябажа уншахаар багахан номуудые хаа-яа хэблэдэгби гэжэ уншаг­шадта харуулба. Корней Чуковскиин хүүгэдтэ зорюулһан зо­хёолнуудые оршуулдаг байна. Хэблэгдэһэн номуудайнь тоо мүнөө дүшөөдтөө хүрэжэ ябана.

Уран зохёол шэнжэлэгшэ, хэлэ бэшэгэй эрдэмэй доктор, профессор Светлана Гармаева ирагуу найрагшын зохёолнуу­дай нэгэ хэды шүлэгүүдэйнь шэнжэлэл хэжэ, имагтал ганса хүүгэдэй поэт бэшэ, мүн баһа ехэшүүлэй уншахаар гүнзэгы удхатай шүлэгүүдтэнь анхаралаа хандуулхаар гэжэ тобшо­лол хэбэ.

Лариса Халхарова уран шадамараар энэ үдэшэ хүтэлжэ, поэдэй зохёохы зам тухайнь хуряангы мэдээсэл үгэбэ. Бу­ряад поэзиин классигтай уулзаһандаа урматайбди гэжэ үхибүүд дүн гаргаба. Хүндэтэ поэт Эрдэни Дугаровтай уулзаһанай дурасхаал болгон, дүрэ зурагуудаа тэдэн суг байжа буулгуулаа.

Үхибүүдтэ зорюулһан зохёолнуудые бэшэхэдээ, талаан бэлигтэй, уран гуурһатай Эрдэни Дугаровтай уулзалга дахи­наа бүри үргэн дэлисэтэйгээр үнгэрхэ аабза гээд найданаб­ди.