1129
Буряад Уласта эмхидхэгдэдэг хүгжэмэй уласхоорондын «Нүүдэлшэдэй ая дуун» гэһэн фестиваль «Russian Event Awards» гэһэн үндэһэтэнэй мүрысөөнэй Гран-при шанда хүртэбэ.
Үсэгэлдэр, октябриин 29-дэ, энэ мүрысөөнэй түгэсхэлэй шата Липецк хотодо үнгэргэгдэбэ. Тиихэдэ Буряад Уласта үнгэргэгдэһэн «Буряад уласай үльгэртэ Сагаалган», «Байгалай һалхин» гэһэн уһанай спортын нааданууд болон «Буузын Баяр-Праздник Буузы» гэһэн үндэһэтэнэй ёһо заншалай фестиваль «Russian Event Awards» гэһэн үндэһэтэнэй мүрысөөнэй номинацинуудта амжалтатай хабаадажа, шагнагдаһан байна.
«Манай хэһэн ажал үндэрөөр сэгнэһэн мэргэжэлтэ шүүбэришэдэй зүблэлдэ баяраа мэдүүлнэбди! «Нүүдэлшэдэй ая дуун» гэһэн фестиваль Буряад уласта аяншалга хүгжөөхэ талаар хэрэгтэй. Манай фестиваль Гран-при шанда хүртэбэ гэжэ дуулаад, баярлааб, уярааб. Энэ хадаа түрэһэн нютагтаа ехэ удха шанартай хэмжээ ябуулга үнгэргэжэ байһанаймнай гэршэ болоно!», - гэжэ фестивалиин арт-захирал, Буряадай филармониин уран һайханай хүтэлбэрилэгшэ Наталья Уланова хэлэбэ.
«Russian Event Awards» гэһэн мүрысөөндэ хабаадаха тухай Ородой Холбоото Уласай 65 можо нютагуудһаа 639 мэдүүлгэнүүд ороһон байна. Түгэсхэлэй шатада хабаадагшад уласай мүрысөөнүүдтэ элирүүлэгдээ. Тиихэдэ сентябрин 30 – октябриин 1-нэй үдэрнүүдтэ Казань хотодо Приволжско болон Уралай федеральна тойрогуудай мүрысөөн үнгэргэгдөө. Октябриин12-13-най үдэрнүүдтэ Владимир хотодо Түбэй, Баруун хойто, Хойто Кавказай болон Южный федеральна тойрогуудай илагшад элирүүлэгдээ. Октябриин 6-7-ной үдэрнүүдтэ Эрхүү хотодо Сибириин болон Алас Дурна зүгэй федеральнай тойрогуудай эрхим түсэлнүүд нэрлэгдээ. Тэрэнэй дүнгүүдээр, «Нүүдэлшэдэй ая дуун» гэһэн фестиваль түрүүлээ гэжэ һануулнабди.
Буряадай филармониин мэдээсэлэй албанай гэрэл зурагууд.
