​Аха аймагта «Наранай туяа» мүрысөөн үнгэргэгдэбэ

Буряад уласай Аха аймагта «Наранай туяа» гэһэн мүрысөөндэ жэл бүри эстрадна дуу гүйсэдхэгшэд эдэбхитэйгээр хабаададаг.

Мүнөө жэлэй эстрадна дуунай мүрысөөндэ Аха аймагай һомонуудай бүхы нютагуудһаа анха түрүүшынхиеэ 68 хабаадагшад суглараа. Энэ хэмжээ ябуулгада дуушад наһанай гурбан бүлэгүүдтэ хубаарһан байна. 7-9 наһатай 30 үхибүүд, 10-13 наһатай 18 үхибүүд, 14-17 наһатай 17 эдир дуушад мүрысөөндэ хабаадаа. «Наранай туяа» мүрысөөндэ хабаадаһан үхибүүд хоёр дуу гүйсэдхэһэн байна. Мүрысөөнэй эрилтээр, нэгэ дуу эдир дуушад өөрын дураар шэлээ, харин хоёрдохи дууниинь Арад зоной нэгэдэлэй үдэртэ зорюулагдаһан байха юм. Үхибүүдэй дуулаха бэлиг талаан Аха аймагай хүтэлбэрилэгшын орлогшо – Ниигэмэй бодолгын талаар хорооной түрүүлэгшэ Оксана Хулуева, аймагай Соёлой хүтэлбэриин дарга Зоригто Цыбиков, аймагай соёлой-сүлөө сагай түбэй захирал Станислав Борбуев, Хүүгэдэй соёлой һургуулиин багша Лариса Мунконова, «Солнышко» гэһэн хүүгэдэй сэсэрлигэй хүгжэмэй багша Татьяна Балданова гэгшэд сэгнэһэн байна.

7-9 наһатай үхибүүдэй дунда Арьяна Цыбикмитова болон Алия Ринчинова хоёр түрүү һуури эзэлбэд. Хоёрдохи һуурида - Кирилл Жалсараев болон Арюна Цыбикова, гурбадахи һуури Аяна Дамшаева Баясхалан Хайдаков хоёр шалгарбад. 10-13 наһатай үхибүүдэй дунда түрүүшын һуури – Аяна Ринчинова, хоёрдохи һуури – Эрдэм-Бэлиг Самбялов, гурбадахи һуури Анастасия Сонопова гэгшэд эзэлбэ. 14-17 наһанай үхибүүдэй дунда түрүүшын хоёр һуури эзэлэгшэд элирүлэгдээгүй, харин гурбадахи һуурида Жугдыр Забанов хүртэбэ.

7-9 наһанай үхибүүдэй дунда Валерия болон Айлана Георгеновтэнэй дуэт ганса байжа, тэдэнэр гурбадахи шатын дипломоор шагнагдаа. 14-17 наһаташуулай дунда Эржена Самбялова болон Бэлигма Самаева хоёрой дуэт гурбадахи һуури эзэлээ.

Аймагай хүтэлбэрилэгшын нэгэдэхи орлогшо Анатолий Ринчинов «Наранай туяа-2017» гэһэн мүрысөөндэ хабаадагшадые амаршалжа, дуунда дуратай, бэлиг талаантай үхибүүдтэ баяр хүргэбэ.

Дуунай мүрысөөндэ илагшад Улаан-Үдэдэ ноябриин 2-4-нэй үдэрнүүдтэ үнгэргэгдэхэ можо хоорондын «Наранай туяа» мүрысөөндэ Аха аймагаа түлөөлхэ.