905
Үнгэрһэн амаралтын үдэрнүүдтэ Буряад драмын театрта «Наранай Туяа» гэһэн эстрадна дуу гүйсэдхэгшэдэй уласхоорондын хүүгэдэй мүрысөөнэй түгэсхэлэй шата болон гала-концерт үнгэргэгдэһэн байна.
Энэ хэмжээ ябуулга Буряад Уласай Соёлой яаман байгуулжа, Арадай уран бүтээлэй уласай түб эмхидхээ. 26-дахияа үнгэргэгдэһэн дуунай мүрысөөн олондо һайшаагдажа, жэлһээ жэлдэ хабаадагшаадай тоо олошорно гэхэдэ алдуу болохогүй. Мүнөө жэлэй мүрысөөндэ хабаадаха тухай 120 мэдүүлгэ ороһон байна. Тэдэнэр сольно болон вокальна бүлэгүүд гэһэн хоёр номинацида 7-9, 10-13, 14-17 наһанай гурбан болзорто хубааржа, үхибүүд мүрысөө. Тиихэдэй Үбэр Байгалай хизаарай Ага һууринһаа хабаадагшад ерэһэн байна.
Хоёр үдэрэй туршада дуунай мүрысөөндэ шэлэн абалга үнгэргэгдэжэ, түгэсхэлэй шатада 18 эдир дуушад хабаадаа. Эстрадна дуушад: Зоригто Тогочиев – жюриин гэшүүдэй түрүүлэгшэ, Мэдэгма Доржиева, Дулма Сунрапова, Сергей Плотников, аранжировщик Павел Карелов, Буряад Уласай Соёлой яаманай ахамад мэргэжэлтэн Наталья Попова, «Арадай урлагай ажалябуулагшадай эблэл» эмхиин түрүүлэгшэ Надежда Донсоронова гэгшэд «Наранай Туяа» мүрысөөнэй жюриин гэшүүд болоо.
«Жэл бүри мүрысөөндэ бэлиг талаантай хабаадагшад олошорно. Үхибүүд бултадаа бэрхэнүүд, зүрхэтэй, бэлиг талаантай. Хүтэлбэрилэгшэд, үхибүүдэй дуулаха дуу шэлэлгэдэ, тиихэдэ ганса хари гүрэнүүдэй бэшэ, харин буряад эстрадын дуунуудта анхаралаа хандуулыт», - гэжэ шүүгшэдэй түрүүлэгшэ Зорикто Тогочиев тэмдэглэбэ.
«Наранай туяа» гэһэн эстрадна дуу гүйсэдхэгшэдэй уласхоорондын хүүгэдэй 26-дахи мүрысөөнэй Гран-при шанда Тарбагатай аймагай Валерия Кириллова хүртэбэ. Тэрэнэй багша хадаа Анастасия Витальевна Мейер юм.
Буряад Уласай Соёлой яаманай сайтһаа гэрэл зураг абтаба.
Мүрысөөнэй түгэсхэлэй шатада хабаадагшадай дипломоор трио Бау Ямпиловай нэрэмжэтэ соёл урлагай һургуулиин шабинар - Дугданова Саяна, Чимитовой Сарана, Маланова Арюна гэгшэд, хотын хүүгэдэй болон эдиршүүлэй түбэй «СКЭТ» ансамбль, Ивалга аймагай «Ассорти» ансамбль болон Улаан-Үдын 1-дэхи лицей-интернетай һурагша Жаргал Балбаров шагнагдаба.
«Вокальный ансамбль» гэһэн номинацида Лауреадай нэрэ зэргэдэ Ярууна аймагай ЯрославаВерхотурова болон Кира Колмакова хоёрой дуэт, Улаан-Үдын Хүүгэдэй урлагай 3-дахи һургуулиин «Озорняшки» ансамбль, Бэшүүр аймагай «Метроном» трио гэгшэд түрүүлбэ.
«Солисты» гэһэн номинацида 3-дахи шатын лауреадай допломдо Улаан-Үдын Хүүгэдэй соёлой 8-дахи һургуулиин Алина Шойжонова, улаан-Үдын 35-дахи һургуулиин һурагша Анна Щепина гэгшэд хүртэбэ. 2-дохи шытын допломоор Зэдэ аймагай Камила Ванчикова, Улаан-Үдын Д. Аюшеевэй нэрэмжэтэ Хүгжэмэй-гуманитарна лицейн шаби Никита Корнаков, Хяагта аймагай Александра Галсанова, Улаан-Үдэ хотын Хүүгэдэй урлагай 4-дэхи һургууулиин шаби Анастасия Соколова болон Үбэр Байгалай хизаарай «Камертон» ансамбль хүртэбэ. 1-дэхи шатын дипломдо Аха аймагай Алина Ринчинова, Бау Ямпиловай нэрэмжэтэ соёл урлагай һургуулии шаби Алина Иванова, Сэлэнгэ аймагай Анита Бальжиева гэгшэд хүртэбэ. Харагшадай һайшаалда хүртэһэн шан Зэдэ аймагай КамилаВанчиковада барюулагдаба.
«Наранай Туяа» мүрысөөнэй түгэсхэлэй шатада хабаадагшадта Буряад Уласай Соёлой яаман мүнгэн шан, Арадай уран бүтээлэй уласай түб дурасхаалта бэлэгүүдые, «Амта», «Бурятхлебпром» бүлгэмүүд амтан бэлэгүүдые барюулаа.
