961
Һүүлэй жэлнүүдэй эгээл удаан болзорто, 77 хоногой туршада, Буряадай гүрэнэй цирк Хабаровск, Якутск хотонуудта гастрольдо гараһанаа, нютагаа бусахань.
Байгша оной августын 21-һээ ноябриин 5 болотор циркын зүжэгшэд Хабаровск хизаар циркдэ – 24, Саха (Яхад) уласай Бриллиантова циркдэ 19 зүжэг наада харуулһан байна. Тиихэдэ артистнар мастер-классуудые үнгэргэжэ, Яхад уласай хатарай «Эрэл» гэһэн арадай театрай зүжэгшэдтэй дүй дүршэлөөрөө хубаалдаһан байна.
Саха (Яхад) уласай болон Хабаровск хизаарай хотонуудай соёлой габьяата хүдэлмэрилэгшэдтэй, олондо мэдээсэл тараадаг хэрэгсэлнүүдэй түлөөлэгшэдтэй уулзаха гэхэ мэтэ соёлой хэмжээ ябуулгануудта Буряадай зүжэгшэд хабаадаа. Ноябриин 9-дэ тэдэнэр нютагаа ерэхэ. Ерэһээр лэ зүжэгшэд Шэнэ жэлдэ зорюулагдаһан нааданда бэлэдхэл эхилхэ юм. «Һонирхолтой зүжэг, хүгжэм, шэнэ трюгууд, онтохонуудай геройнууд, олон эди шэдитэ үйлэ хэрэгүүд харагшадые һонирхуулха», - гэжэ Буряадай гүрэнэй циркын уран һайханай хүтэлбэрилэгшэ Туяна Догданова хэлэбэ.
Буряад Уласай Соёлой яаманай сайтһаа гэрэл зураг абтаба.
