886
Ноябриин 14-дэ Москва хотын «Геликон-опера» гэһэн хүгжэмэй театрта «Хүүгэдэй урлагай һургуулиин эрхим багша», «Ородой Холбоото Уласай хүгжэмэй училищи болон колледжнүүдэй хүгжэмэй-теоретическэ һалбариин эрхим багша», «Хүүгэдэй урлагай эрхим 50 һургуули» гэһэн Бүхэроссиин мүрысөөндэ илагшадые баяр ёһололой оршондо шагнаба.
Энэ мүрысөө Ородой Холбоото Уласай Соёлой яаман үнгэргэһэн байна. Ородой Холбоото Уласай 43 можо нютагуудай хүгжэмэй училищи болон колледжнүүдэй 10 багшанар, хүүгэдэй урлагай һургуулинуудай 50 багшанар лауреадай нэрэ зэргэдэ хүртөө. Ородой Холбооной 44 можо нютагуудай хүүгэдэй урлагай һургуулинууд эрхимлээ.
Галина Петровна Халбаева
Буряад Уласай Соёлой яаманай сайтһаа гэрэл зураг абтаба.
Ородой Холбоото Уласай хүгжэмэй училищи болон колледжнүүдэй хүгжэмэй-теоретическэ һалбариин эрхим багшанарай тоодо П.И. Чайковскиин нэрэмжэтэ Соёл, урлагай колледжын багша, Буряад Уласай соёлой габьяата хүдэлмэрилэгшэ, Ородой Холбоото Уласай дунда мэргэжэлтэй болбосоролой хүндэтэ хүдэлмэрилэгшэ Галина Петровна Халбаева ороһон байна. Мүрысөөнэй гуримай ёһоор, хабаадагшад зохёохы намтар эльгээхэһээ гадна, өөрын бэшэһэн һуралсалай-методическа заабаринууд, программануудые, бүхэроссиин болон уласхоорондын мүрысөөнүүдтэ амжалта туйлаһан оюутадай дипломуудай буулгабаринуудые болон нээмэл хэшээлэй видеобуулгабари эльгээхэ ёһотой байгаа. Галина Халбаевагай ажалнууд болон Б.Б. Ямпиловай «Опера «Чудесный клад» гэһэн сэдээбээр үнгэргэгдэһэн нээмэл хэшээл жюриигн гэшүүд үндэрөөр сэгнэһэн байна.
Ородой Холбоото Уласай Соёлой Владимир Мединский болон Москвагай консерваториин дэргэдэхи Академическэ хүгжэмэй училищиин захирал Владимир Демидов гэгшэд бүхэроссиин мүрысөөндэ илагшадта шан барюулжа амаршалба.
