861
Анна Огороднигой гэрэл зураг
Ноябриин 29-30-най үдэрнүүдтэ Буряад драмын театрта «Алдар. 9 секунд» гэһэн зүжэгэй премьерэ үнгэргэгдэхэ.
Ородой Холбоото Уласай Герой Алдар Цыденжапов «Быстрый» гэжэ эсминец-корабль дээрэ уялгата алба гараха үедөө дайшалхы онгосоёо, суг алба хэдэг нүхэдөө абаржа, 2010 оной сентябриин 28-да ами наhанhаа хахасаа бэлэй. Алдар Цыденжаповта зорюулагдаһан зүжэг тэрэнэй гаргаһан баатаршалга мартагдашагүй, хүнүүдэй зүрхэ сэдьхэлдэ хадуугдажа, гүлмэрхэн хүбүүнэй дурасхаалай хүшөө болоно.
- Энэ болоһон ушар намда дүтөөр хадуугдана. Би Алдартай нэгэ һургуулида, Ага һууринда ажаһуугааб, – гэжэ найруулагша Саян Жамбалов хэлэнэ.
Буряад Уласай Соёлой яаманай сайтһаа гэрэл зураг абтаба.
2017 оной үбэл Саян Жамбалов Ага нютагаа гаража, Алдартай суг һураһан нүхэдөөрнь, гэртэхинээрнь уулзаһан байна. Алдарай эжытэй нюур нюураараа уулзажа, Алдарай мүнхэ дурасхаалда зорюулан, зүжэг табиха хүсэлтэйбди гэхэдэм, тэдэнэр зүбшөөлөө үгөө.
Зүжэг дотор ажабайдалһаа бодото үйлэ хэрэгүүд, залуу үетэнэй оюун хаһа, уулзалга, хахасалга, далайн сэрэгшэдэй хүнгэн бэшэ үдэр бүриин байдал харуулагдаха. Алдар тухай һайханаар дурсан, ами наһаяа гамнангүй, баатаршалга гаргаһан хүбүүнэй нэрэ хэтын хэтэдэ мүнхэ гэжэ зүжэгшэд харуулха гэжэ оролдохо. Энэ үдэшэ Алдарай эхэ эсэгэ, Батор Жаргалович, Билигма Зыдыгаевна болон тэрэнэй эхирэй үрөөһэн Арюна басаган уригданхай.
Хүгжэм найруулагша Сойжин Жамбалова, тиихэдэ Москвагай мэргэжэлтэд – уран зурааша Ольга Богатищева, хатар табигша Мария Сиукаева, видео уран зурааша Алексей Бересенев гэгшэд зүжэг дээрэ хүдэлнэ.
Ородой Холбоото Уласай Геройдо зорюулагдаһан зүжэг харахыетнай уринабди.
