983
Буряад Уласай Л. П. Сахьяновагай болон П.Т. Абашеевэй хатарай колледжын 3-дахи курсын оюутан Анна Кузнецова баледэй хатаршадай болон хатарай багшанарай Бүхэроссиин мүрысөөндэ «Характерный танец» гэһэн номинацида түрүүлбэ.
Москва хотын Н.И.Сацай нэрэмжэтэ Хүгжэмэй театрта баледэй хатаршадай болон хатарай багшанарай хоёрдохи мүрысөөн үнгэргэһэгдэһэн байна. Баледэй мэдээжэ хатаршан, хатарай багша Юрий Николаевич Григорович мүрысөө эмхидхэхэ гэжэ үүсхэл гаргажа, Ородой Холбоото Уласай Засагай газар болон Соёлой яаман тэрэ үүсхэлыень дэмжэжэ, мүрысөө эмхидхэһэн байна. Зүблэлтэ сагай үедэ үнгэргэгдэдэг баледэй хатаршадай мүрысөөнэй ашаар мэдээжэ болоһон Надежда Павлова, Генрих Майоров, Владимир Васильев, Людмила Семеняка, Владимир Елизарьев, Вячеслав Гордеев болон бусадай, баледэй бэлигтэй хүдэлмэрилэгшэдэй ашата хэрэг үргэлжэлүүлэн, энэ мүрысөөн үнгэргэгдэнэ.
«Характерный танец» гэһэн номинацида Ородой Холбоото Уласай можо нютагуудай баледэй хатаршадай дундаһаа Анна Кузнецова гурбадахи шанда хүртэжэ, илагшын дипломоор шагнагдаа. Эдир басаган Ю.Н.Григорович түрүүтэй мэргэжэлтэ шүүгшэдэй магтаалда хүртэһэн байна гэжэ тэмдэглэлтэй.
Буряад Уласай Соёлой яаманай сайтһаа гэрэл зураг абтаба.
– Бидэ Анные үнэн зүрхэнһөө амаршалнабди, омогорхонобди. Энэ хадаа ерээдүйн ажабайдалайнь түрүүшын алхам болоно! Любовь Ивановна Иданова багша тухайнь хэлэхэ шухала. Бэрхэ шабинарые, мэдээжэ хатаршадые хүмүүжүүлдэг бэлиг талаантай багша юм, – гэжэ колледжын хүдэлмэрилэгшэд тэмдэглэнэ
