889
Буряадай циркын һургуули «Ородой Холбоото Уласай нэмэлтэ һуралсалай эрхим 100 эмхинүүд» гэһэн мүрысөөнэй «Циркын эрхим һургуули - 2017» гэһэн номинацида лауреадай нэрэ зэргэдэ хүртэбэ. Мүрысөөндэ илагшад зохёохы үндэр амжалтануудай түлөө диплом болон алтан медаляар шагнагдаа. Буряадай циркын һургуулииин хүтэлбэрилэгшэ Наталья Юрьевна Афанасьевада «Эрхим захирал - 2017» гэһэн хүндэлэлэй тэмдэг барюулжа, «Почетный член Международной академии качества и маркетинга» гэһэн нэрэ зэргэ олгогдоо.
Буряад Уласай Соёлой яаманай сайтһаа гэрэл зураг абтаба.
– Энэ хадаа болбосоролой һалбарида ехэ удха шанартай шагналнуудай нэгэн болоно. Мүрысөөндэ хабаадажа, үндэр амжалта туйлаад байхада ехэ хүндэтэй! Үндэр амжалта туйлаһан эрхим эмхинүүд алтан медаляар шагнагдадаг , - гэжэ Буряадай циркын һургуулида хэлэбэ.
Буряадай циркын һургуулиин «Ородой Холбоото Уласай нэмэлтэ һуралсалай эрхим 100 эмхинүүдэй» тоодо ороһонииень гэршэлжэ, шабинарайнь амжалтанууд тухай һануулнабди. Буряадай эдир бэлигтэн Бүхэроссиин мүрысөөнүүдтэ «Гимнастика» номинацида Гран-при шанда хүртөө. «Акробатика» номинацида лауреадай 1-дэхи шатын допломоор, «Эквилибр» номинацида лауреадай 20дохи шатын дипломоор шагнагдаа. Тиихэдэ Ородой Холбоото Уласай арадай артист И.П.Осиповагай тусхай шанда хүртэһэн байна. 2017 оной октябриин 30-һаа ноябриин 2 болотор Челябинск хотодо үнгэргэгдэһэн «Сальто в будущее» гэһэн Бүхэроссиин XII-дохи фестиваль-конкурсдо «Найруулагшын эрхим ажал» гэһэн номинацида лауреадай 2-дохи шатын дипломоор, «Оригинальный жанр» номинацида лауреадай 3-дахи шатын дипломоор циркын һургуули шагнагдаа. Тиихэдэ 2017 оной ноябриин 1-һээ 3 болотор Шэтэ хотодо үнгэргэгдэһэн Хүүгэдэй болон эдиршүүлэй зохёохы бэлиг талаангай «Гуранёнок - 2017» гэһэн уласхоорондын 9-дэхи фестивалиин лауреадай 3-дахи шатын дипломдо циркын һургуулиин шабинар хүртэһэн байна.
«Ородой Холбоото Уласай нэмэлтэ һуралсалай эрхим 100 эмхинүүд» мүрысөөндэ Ородой Холбоото Уласай Москва можын, Саха (Яхад) уласай, Ямало-Ненецкэ тойрогой, Санкт-Петербургын, Новосибирск, Нижний Тагил, Орск, Малгобек, Улаан-Үдэ, Липецк, Тюмень, Курск, Воронеж, Хабаровск, Воркуты, Норильск, Саратов, Ярославль хотонуудай болон бусад можо нютагуудай эрхим 40 эмхинүүд хабаадаа. «Ородой Холбоото Уласай нэмэлтэ һуралсалай эрхим 100 эмхинүүд» мүрысөөн анха түрүүшынхиеэ 2013 оной хоёрдохи хахад жэлдэ үнгэргэгдэжэ, Ородой Холбоото Уласай болбосоролой һургуули, лицей, гимназинууд болон нэмэлтэ һуралсалай эмхинүүдэй дунда дэмжэгдэһэн байна.
Бэеэ даанхай олониитын эблэл бүридэлдэ ородог Федерациин Зүблэлэй эрдэм, болбосорол болон мэдээсэлэй бодолгын хорооной, Гүрэнэй Дүүмын Болбосоролой хорооной, Гүрэнэй Дүүмын эрдэмэй болон эрдэмэй технологиин хорооной, Ород гүрэнэй дунда мэргэжэлэй һургуулинуудай захиралнуудай эблэлэй, Ородой Холбооной һургуулинуудай захирал болон багшанарай үндэһэтэнэй ассоциации, Маркетингын болон шанарай уласхоорондын академиин түлөөлэгшэд энэ мүрысөө эмхидхэнэ. Болбосоролой асуудалнуудта зорюулагдаһан хуралдаанай үедэ лауреадуудай шагнал үнгэргэгдэнэ.
