827
2017 оной декабриин 7-9-нэй үдэрнүүдтэ Москва хотодо мүнөө үеын хүгжэм найруулагшадай «Чайковский-Наследие» гэһэн уласхоорондын мүрысөөн – фестиваль үнгэргэгдэһэн байна. Энэ хэмжээ ябуулгада Ородой Холбоото Уласай можо нютагуудай болон хари гүрэнүүдэй 189 хүгжэм найруулагшад хабаадаа. Хүгжэм зохёогшод мүрысөөнэй үедэ бэлиг шадабарияа мүлихэ, зохёолнуудаа олондо харуулха аргатай байба. Ярославль хотын Виктор Кожевников фестивалиин гран-при шанда хүртэбэ.
Тэдэнэй тоодо П. И. Чайковскиин нэрэмжэтэ соёл, урлагай колледжын оюутад, залуу хүгжэм найруулагшад, Никита Троицкий Барас Дабаев энэ мүрысөөндэ хаба шадалаа амжалтатайгаар туршалсаһан байна. Эдэ залуушуул Ородой Холбоото Уласай композиторнуудай эблэлэй гэшүүн, Буряад Уласай хүгжэм найруулагшадай эблэлэй түрүүлэгшэ, Буряад Уласай соёлой габьяата хүдэлмэрилэгшэ Лариса Николаевна Санжиевагай хүтэлбэри доро хүгжэм найруулгада һурадаг юм. Бэлигтэй багша хүгжэм найруулагшадай мүрысөөнэй дипломоор шагнагдаа.
П. И. Чайковскиин нэрэмжэтэ Москвагай гүрэнэй консерваториин профессор, Ородой Холбоото Уласай соёлой габьяата хүдэлмэрилэгшэ, Ородой Холбоото Уласай хүгжэм найруулагшадай эблэлэй гэшүүн Т. А. Чудова, Ородой Холбоото Уласай Засагай газарай шангай лауреат, Ородой Холбоото Уласай соёлой габьяата хүдэлмэрилэгшэ Г. В. Гладков, Ородой Холбоото Уласай соёлой габьяата хүдэлмэрилэгшэ, Ородой Холбоото Уласай арадай артист, хүгжэм-дуу найруулагшаО. Б. Иванов, бүхы дэлхэйдэ мэдээжэ оперын дуушад, «Спешите делать добро» жасын түрүүлэгшэ, хүтэлэгшэ О. Г. Федорова, Ород гүрэнэй Большой театрай дуушан, Уласхоорондын мүрысөөнүүдэй лауреат, П. И. Чайковскиин нэрэмжэтэ Москвагай гүрэнэй консерваториин ганса дуушанай һалбариин Е. И Скусниченко, П. И. Чайковскиин нэрэмжэтэ Үндэһэн соёл дэмжэдэг жасын юрэнхылэгшэ, «Служение искусству» орденой кавалер Д. А. Галихин гэгшэд мэргэжэлтэ шүүгшэдэй гэшүүд болоһон байна.
Фестивалиин дүнгүүдээр, Никита Троицкий «Камерная, вокально-инструментальная музыка» гэһэн номинацида дипломантын нэрэ зэргэдэ хүртэбэ. Тиихэдэ Барас Дабаев «Произведения для детей» гэһэн номинацида баһал дипломантын нэрэ зэргэдэ хүртэһэн байна.
Буряад Уласай Соёлой яаманай сайтһаа гэрэл зураг абтаба.
Буряад Уласай Соёлой яаманай болон "Эндаумент ВАРК" гэһэн коммерческэ бэшэ жасын дэмжэлгээр эдэ хүбүүд Москва хото мүрысөөндэ хабаадаа.
