1539
Буряад Уласай Соёлой яаманай сайтһаа гэрэл зураг абтаба
Байгша оной декабриин 25-да Буряадай Үндэһэтэнэй номой санда үдэрэй 15 сагта Цырен-Дулма Дондогойн 85-жэлэй ойдо зорюулагдаһан «Холын харгыда» гэһэн богони хэмжээнэй баримтата фильмтэй танилсалга үнгэргэгдэхэ.
Буряад Уласай Соёлой яаманай дэмжэлгээр найруулагша Баярма Жалцанова энэ фильм буулгаба.
Цырен-Дулма Дондогойн түрэһэн эгэшэ Цыжип Нимаевагай дурсалгануудта үндэһэлжэ кино буулгагдаа. Ирагуу найрагшын ажабайдал, намтар холын харгы мэтээр кинодо харуулагдана. Цырен-Дулма Дондогой болон хүгжэм найруулагша Базар Цырендашиев хоёрой зохёоһон «Холын харгыда» гэһэн дуугаар кино эхилнэ.
- Ирагуу найрагшын түрэл нютаг Ярууна аймаг ошоходомнай, РСФСР-эй габьяата артистка, «Холын харгыда» дуунай түрүүшын гүйсэдхэгшэ Светлана Бунеева дахуулаа, - гэжэ фильмын найруулагша Баярма Жалцанова хөөрэнэ.
Цырен-Дулма Дондогой бага балшар наһанай хаһые Улаан-Үдын һургуулиин 3-дахи ангиин һурагша Намгар Ширапова, ирагуу найрагшын эжые Эгэтын Адагай Соёлой байшанай хүдэлмэрилэгшэ Юлия Мункоева гэгшэд гүйсэдхөө. Уран найруулгануудай эхэнэрнүүдэй рольнуудые РСФСР-эй габьяата артистка Дарима Сангажапова, Буряад Уласай соёлой габьяата хүдэлмэрилэгшэ Сэсэгма Шойдокова болон киногой зүжэгшэн Баирма Борбоева гэгшэд уран гоёор наадаба.
- Фильм хэдэн бүлэгүүдһээ бүридэнэ. Түрүүшын бүлэгтэ 10 һаратай нарай нялха Цырен-Дулма басагые үхибүүгүй түрэлдөө үргэжэ үгэхэнь харуулагдана. Үргэжэ абаһан эжыдэ киногой шухала бүлэг зорюулагдана. Эжыдээ хандалга, эгээл дүтын хүнөө алдажа, тэрээн тухай һанаа бодолдо абтаһаниинь, ирагуу найрагшын бүхы зохёолнууд дотор харуулагданхай. Удаадахи бүлэгүүд уран зохёолшын инаг дуран, үхибүүд болон дуратай ажалдань зорюулагдаа, - гэжэ Баярма Жалцанова хэлэнэ.
