1000
Буряад Уласай Соёлой яаманай сайтһаа гэрэл зураг абтаба.
Буряад Уласай Мухар-Шэбэр аймагай Хошун-Үзүүр нютагта Соёлой байшан шэнээр баригдаба.
Буряад Уласай Арадай Хуралай һунгамал Зорикто Цыбикмитов, Уран бүтээлэй уласай түбэй захиралай орлогшо Сергей Доржиев, Мухар-Шэбэрэй аймагай хүтэлбэрилэгшэ Владимир Молчанов, аймагай һунгамалнуудай зүблэлэй түрүүлэгшэ Ольга Симухина, Мухар-Шэбэр аймагай Соёл болон аяншалгын хүтэлбэриин дарга Маргарита Гороховская, аймагай һомонуудай дарганар болон хүдөө ажахын хүтэлбэрилэгшэд Соёлой байшанай нээлгын баяр ёһололдо хабаадаба.
Хошун-Үзүүрэй Соёлой байшан 2014 ондо түймэртэ шатаһан байна. Сүлөө сагаа клубта үнгэргэдэг байһан арад зон ехэтэ голхорһон юм. Тиимэһээ Соёлой байшанай барилгын эхилхэдэ, нютагай зон эдэбхитэйгээр хабаадалсаа. Мухар-Шэбэр аймагай долоон ТОСуудай хүсөөр барилгын ажалнууд хэгдээ. Тиихэдэ тэдэнэр 100 мянган түхэриг барилгада оруулһан байха юм.
- Соёлой байшанай барилгада Мухар-Шэбэр аймагай һанһаа мүнгэн һомологдоо. 2015 ондо 700 мянган түхэриг һомологдожо, барилга хэхэ модо, хабтагайнуудые худалдажа абаабди. 2016 ондо үшөө 560 мянган түхэриг үгтэжэ, сонхо, үүдэ табяабди, дулаасуулгын, зайн галай, гэрэлтүүлгын түхеэрэлгэнүүд тодхогдоо. Тиихэдэ зуу мянган түхэриг ТОСууд нэмэри болгон оруулаа, - гэжэ Хошун-Үзүүрэй хүтэлбэрилэгшэ Жаргал Иванов хэлэбэ.
Барилга хэгдэһэнэй удаа һомоной захиргаан болон номой сан энэ байшанда оруулха гэһэн шиидхэбэри абтаһан байна. «Ниитэ нэгэ Росси» намай «Нютагай соёлой байшан» гэһэн федеральна түсэлэй хэмжээндэ харагшадай танхимда гэрэлтүүлгэ хэгдэһэн байха юм. Энэ түсэл бэелүүлгэдэ федеральна болон уласай бюджедүүдһээ 470 мянган түхэриг һомологдоо.
Соёлой байшан шэнээр бодхоогдожо, хүн зон ехэ урматай, шэнэ байшандаа эдэбхитэйгээр ажал ябуулха эмрмэлзэлтэй. 78 наһатай Сергей Дамбиевич Дамбиев олон жэлэй туршада хүтэлбэрилһэн вокальна-инструментальна ансамбль дахин һэргээхэ хүсэлтэй байһанаа мэдүүлээ.
