1247
Эрхүү можын Слюдянка тосхондо ажаһуудаг Байгалай Жабар үбгэн декабриин 16-17-ной үдэрнүүдтэ түрэһэн үдэрөө тэмдэглэбэ. Энэ ехэ баярта Буряадһаа Сагаан үбгэниие уриһан байна.
“Урилгыень тогтоон абажа, тиишэ ошожо ерэбэб. Ехэ һонин байгаа”, - гээд, Буряадаймнай Сагаан үбгэн болохо Ородой Холбоото Уласай габьяата артист Дамба-Дугар Бочиктоев мэдээсэбэ. Удаань иигэжэ нэмэбэ:
- Слюдянкаһаа холо бэшэхэнэ оршодог Улаан хада хамагай түрүүн хүрөөбди. Тэндэ үхибүүд эжы абанартаяа хамта хадаһаа санаар, шаргаар һолжорно... Ехэ хүхюутэйгээр сүлөө сагаа үнгэргэнэ гэжэ харааб. Жабар үбгэнтэеэ хамта шаргада һуужа, тэндэ байһан үхибүүдтэ бэлэгүүдые хүргэн дамжуулааб.
Харин удаадахи үдэрынь хоёр үбгэднай Байкальское һууринай дэргэдэхи Булган хада хүрэһэн байна. Тэндэ оньһон түхерэлгын хүсөөр хадын оройдо гаража, аяншалгын аятай комплекстой танилсаа.
- Холын аяншадые хүлеэн абамаар хамаг түхеэрэлгэнүүд, тэрэ тоодо зошодой буудал, хоол баридаг ресторан болон бусад Булган хада дээрэ байгуулаатай гэжэ һайшаан адаглаабди. Аюултай спорт гээшые гайхан анхараабди, - гээд Сагаан үбгэн тэмдэглэбэ.
Хүршэ Эрхүү можын Улаан болоод Булган хадануудай орой дээрэ гаража, олондо бэеэ мэдүүлжэ, Жабар үбгэнөө амаршалаад бусаһан Сагаан үбгэмнай Шэнэ жэлдээ бэлдэлгэеэ эршэдүүлхэнь. Улаан Хэрэмэй курантын дохёо үгэтэр, арбаад лэ хоног үлэбэ.
Сарюуна ЭРДЫНЕЕВА
