1602
2018 оной июлиин 5-8-най үдэрнүүдтэ Уласхоорондын «Алтаргана» фестиваль Эрхүү хотодо үнгэргэгдэхэ.
Буряад арадай үндэһэтэнэй «Алтаргана-2018» гэһэн хэмжээ ябуулгада Буряад Уласай, Агын болон Усть-Ордагай Буряад тойрогуудай, Эрхүү болон Шэтэ можонуудай ажаһуугшад, СНГ, Монгол, Хитад, Солонгос, Япони болон бусад хари гүрэнүүдэй, Ородой Холбоото Уласай можо нютагуудай буряад зоной эблэлнүүд хабаадаха гэжэ Эрхүү можын “Байгал шадарай үндэһэн арадуудай соёлой түб” мэдээсэнэ.
Эрхүү можын хүтэлбэрилэгшэ Сергей Левченкын абаһан шиидхэбэреэр, Алтарганын наадан Эрхүү хотодо үнгэргэгдэхэ. Уласхоорондын фестиваль үнгэргэхэ болзор тухай Улаан-Үдэдэ сентябриин 21-22-рой үдэрнүүдтэ эмхидхэгдэһэн «Бүгэдэ Буряадай үндэһэн соёлой түб» гэһэн Можо хоорондын олониитын хүдэлөөнэй зүблэлэй президиумай суглаанда хэлсэгдэһэн байна. Тиихэдэ Усть-Ордын тосхондо зарим тэды хэмжээ ябуулгануудые үнгэргэхэ тухай хэлсэгдэнэ.
«Алтаргана» нааданай түүхэдэ анха түрүүшынхиеэ тус фестиваль Евразиин арадуудай болон Ородой Холбоото Уласай арадуудай ассамблейнуудай дэмжэлгээр үнгэргэгдэхэ. Тиимэһээ «Алтаргана» наадан улам хүгжэжэ, уласхоорондын болон бүхэроссиин хэмжээндэ үнгэргэгдэхэ юм.
Фестивалиин хэмжээндэ зохёохы мүрысөөн болон харалганууд, «Байгалай хизаарай булюу талануудые олондо мэдүүлхэ» гэһэн уласхоорондын эрдэмэй-практическа хуралдаан, буряад арадай ажабайдал, ажахы харуулһан «Нангин бууса» мүрысөөн болон тамирай нааданууд эмхидхэгдэхэ. «Алтаргана» нааданай үнгэргэхэ талмайнууд элирүүлэгдэжэ, тэдэниие залан хүтэлбэрилэгшэд томилогдоо. Эмхидхэлэй ажал үргэлжэлһөөр.
Буряадай үндэһэн арадай «Алтаргана» гэһэн уласхоорондын фестиваль хадаа буряад арадай үндэһэн соёл һэргээхэ, сахин хүгжөөхэ хэмжээ ябуулга болоно. Анха түрүүшынхиеэ 1990 ондо дуунай мүрысөөн гэжэ Монголдо эхилһэн хэмжээ ябуулга Ородой Холбоото Уласай можо нютагуудта болон дэлхэй дүүрэн ажаһуудаг буряад арадые нэгэдүүлһэн «Алтаргана» улам хүгжэжэ байһаниинь һайшаалтай.
Анна Огороднигой гэрэл зураг.
