​«Синяя птица» урилдаанда хабаадана

Үнгэрһэн долоон хоногой эсэстэ “Россия-1” телеканалаар “Синяя птица” гэһэн бүхэроссиин түсэл бүхы Буряад ороной ажаһуугшад хараба. Шалтагаан гэхэдэ, манай ниислэл хотын “Алтаргана” гэжэ нэрлэгдэһэн бүлэг ээлжээтэ дабаа гаталжа, түгэсхэлэй шатада оробо.

Бүхы дэлхэй дээрэ мэдээжэ болоһон энэ түсэлдэ хари гүрэнүүдэй, Ородой бүхы можо нютагуудай бэ­лигтэй олон хүбүүд, басагад хабаа­дана. Тэдэнэй тоодо Буряадаймнай үхибүүдэй оролсоходонь баярламаар байна.

“Алтаргана” бүлэг гурбан хүнһөө бүридэнэ. Тэдэ буряад арадай хүгжэмэй зэмсэгүүдээр наадана. 13 наһатай Тимур Найданов морин хуур дээрэ гоё аялгануудые зэдэлүүлдэг юм. Энээнһээ гадна Тимур робото­техникэ болон хатараар һонирходог. 12 наһатай Марина Цыбенова ятага дээрэ наададаг. Сүлөө сагтаа Марина басаган ном уншаха, дуулаха, зураха дуратай, мүн сагаалса буудалгын сек­цидэ ябажа, пистоледээр буудадаг. 9 наһатай Юлия Жамбалова лимбэ дээ­рэ наадажа, ерээдүйдэ мэргэжэлтэ ар­тист болохо һанаатай.

- “Синяя птица” гэһэн түсэлдэ ехэ дуратайгаар хабааданаб. Юуб гэхэдэ, эндэ өөрынгөө бүхы бэлиг шадаба­рияа харуулнаш. Хажуугаарнь олон үхибүүдтэй танилсажа, нүхэд боло­нобди, - гэжэ Юлия нэгэ дамжуулгада мэдүүлһэн байна.

Эдэ гурбан бэлигтэй хүүгэд Улаан-Үдэдэ ажаһуудаг юм. Тэдэ Пётр Чай­ковскиин нэрэмжэтэ хүгжэмэй кол­леджын дэргэдэхи хүүгэдэй уралигай һургуулиин, хүүгэдэй уралигай 4 бо­лон 7 дугаар һургуулинуудай шаби­нар мүн.

Ерэхэ амаралтын үдэр “Россия-1” телеканалаар түсэлэй түгэсхэлэй шата дамжуулха. Манай бэлигтэй гур­бан һайн дүн харуулха бэзэ гэжэ найданабди. Олоной һанамжаар, ганса финалда ороһониинь аргагүй ехэ амжалта болоно бшуу.

Эндэ Буряадай үшөө нэгэ хүбүүн хабаадаха аргатай. Юуб гэхэдэ, Улаан-Үдэ хотын 25 дугаар һургуулиин 11-дэхи ангиин һурагша Андрей Цыдендамбаев харагшадай дуугаа үгэлгэдэ хабаадана. Зургаан хүнүүд сооһоо эгээл эрхим уран уншагша элирүүлэгдэжэ, түгэсхэлэй шатада бэеэ харуулха эрхэдэ хүртэхэ. Мүнөө һүни харагшадай дуугаа үгэлгэ түгэсэхэ юм.

2017 ондо Буряад Уласай түлөөлэгшэд гүрэнэйнгөө федеральна телеканалнуудта шадамар бэрхээр хаба­адажа байна гээд хэлэлтэй. Үнгэрһэн хабар суута “Байгал” театрнай “Тан­цуют все!” гэһэн түсэлдэ түрүү һуури эзэлээд, нэгэ сая түхэриг шанда хүртөө бэлэй гээд һануулая.

НТВ телеканал дээрэ эдэл үдэрнүүдтэ эмхидхэгдэжэ байһан “Ты супер! Танцы” гэһэн бүхэроссиин түсэлдэ Хойто-Байгалай аймагай Нижнеангарск һууринай Анастасия Яшкина шалгараад, финалда ороод байна гэжэ мэдүүлэе.

Борис БАЛДАНОВ