1058
Вячеслав Бутусов болон "Алтаргана" ансамбль
Бултанай мэдэһээр, үнгэрһэн гарагай нэгэндэ «Россия-1» телеканалаар «Синяя птица» гэһэн бүхэроссиин урилдаанай түгэсхэлэй шата үнгэргэгдэбэ. Энэ хэмжээ ябуулгада Буряад уласай «Алтаргана» ансамбль болон уран уншагша Андрей Цыдендамбаев хабаадаба.
«Синяя птица» урилдаанай хабаадагшад, «Алтаргана» ансамблиин гэшүүд – Тимур Найданов, Марина Цыбенова болон Юлия Жамбалова гэгшэд рок-хүгжэмшэн Вячеслав Бутусовтай хамта тайзан дээрэ гараба. Тэдэнэр «Гудбай, Америка!» гэһэн дуу буряад арадай хүгжэмэй зэмсэгүүдээр наадаба. Вячеслав Бутусов өөрөө гитараар наадажа байгаад дуулаба. Тиихэдэ Тимур Найданов – морин хуур, Марина Цыбенова – ятага, Юлия Жамбалова – лимбэ дээрэ ирагуу гоёор наадажа, харагшадай халуун альга ташалгада хүртэбэ. Олон янзын хүгжэмэй һалбари тааруулһан квартет Поповой нэрэмжэтэ хүүгэдэй хоор шэмэглэбэ.
Бүхэроссиин урилдаанай шүүгшэ, мэдээжэ хүгжэмшэн Денис Мацуев буряад үхибүүдэй гүйсэдхэһэн тухай хэлэхэдээ, өөрынгөө эдир наһан тухай һанаба.
«Гудбай, Америка!» гэжэ дуу наадажа һураад, олоной, илангаяа басагадай һайшаалда хүртэдэг һэмби. Хүгжэмэй хэдэн һалбари нэгээдүүлжэ, ирагуу наадалгаар шэдитэ оршон байгуулһан таанарта баяр хүргэнэб», - гэжэ Денис Мацуев хэлэбэ.
Бүхэроссин урилдаанай шэлэн абалгын шатада «Алтаргана» ансамбль Борис Гребенщиковой «Город золотой» гэһэн дуунай хүгжэм гүйсэдхэжэ, түгэсхэлэй шатада хабаадаха эрхэдэ хүртөө.
Энэл мүрысөөндэ Улаан-Үдын 25-дахи һургуулиин шаби Андрей Цыдендамбаев түгэсхэлэй шатада уран гоёор хэлэлгэдэ хабаадаба. Энэ мүрысөөндэ илаһан хүн «Маяк» радиодо урилгатай байгаа. Түгэсхэлэй шатада Андрей Цыдендамбаев Москва хотын Варвара Вельматкинатай уулзаба. Эдир уншагшад компромисс гэһэн ойлгосо тухай өөрынгөө һанамжануудаараа хубаалдаа. Мэдээжэ сэтгүүлшэн Владимир Соловьёв энэ урилдаа хүтэлбэ. Ородой Холбоото Уласай Гадаадын хэрэгүүдэй яаманай мэдээсэлэй болон хэблэлэй департаментын захирал Мария Захарова үгэ андалдаанай шүүгшэ болобо. Эдир уншагшадые шагнажа, хоюулан түрүүшын һуури эзэлбэт гэжэ Мария Захарова хэлэбэ.
«Баян уран хэлэтэй, хайшан гэжэ үгэ андалдаа үнгэргэхэб гэжэ ёһотой жэшээ харуулбат», - гэжэ Ородой Холбоото Уласай Гадаадын хэрэгүүдэй яаманай мэдээсэлэй болон хэблэлэй департаментын захирал тэмдэглэбэ. «Синяя птица» урилдаа суг эмхидхэлсэһэн «Маяк» радиогой түлөөлэгшэ Сергей Стиллавин би хоюулыень абаха эрхэгүйб, тиигэбэшье эдэ хоёр бэлигтэй үхибүүдые хоулыень радиодо уриха тухай хүтэлбэрилэгшэдтөө хэлэхэб гэжэ найдуулба.
Урилдаанай һүүлээр Сергей Соловьёв Андрей Цыдендамбаев Варвара Вельматкина хоёрые телепередачада хабаадахыень уриба. Тиихэдэ Ородой Холбоото Уласай гадаадын хэрэгүүдэй яаманай мэдээсэлэй болон хэблэлэй депертаментын захирал яаманай ажалтайнь танилсахыень баһа уриба.
Буряад Уласай Соёлой яаманай сайтһаа гэрэл зураг абтаба.
