​Шэдитэ үйлэ бүтээдэг цирк

Наталья Борисова

Буряадаймнай циркын захирал Наталья Борисо­ва Шэнэ жэлээ уг­туулан, үнгэрһэн жэлэй дүн согсолжо, манай табиһан асуудалнуудта харюусаба.

- Наталья Владими­ровна! Үнгэржэ байһан жэл хэр гээшэб?

- Үнэхөөрөө, энэ жэл­най ехэл эршэмтэй бай­гаа. Манай цирк угаа ехэ ажал хээ. Үбэр Байгалай хизаараар, Агын тойрог, Түнхэн, Аха аймагуудаар, Слюдянка, Шэтэ хотонуу­даар гастрольнуудта яба­абди. Захаамин аймагай ойн баярта ошожо, хэды ехэ аадар бороогой орожо­шье байхадань, наадаяа харуулаабди. Үглөөнһөө хүн зон бидэниие хүлеэжэ, стадионоор дүүрэн хараг­шад суглараад байгаа. Удаан сагай болзорто Хабаровск, Якутск хотонуудаар наадаяа дэлгэжэ ябаабди. Сагаалга­най үедэ Москва хотодошье наадаяа харуулаабди.

Циркымнай бэелүүлһэн хэдэн түсэлнүүд сооһоо “Минута славы” гэһэн телехаралганда илагша Тина Мамоновагай хабаадалгатай Бүхэдэлхэйн циркнүүдэй үдэр болон “Ночь в цирке” гэһэн шэнэ түсэл онсолол­той. Эдэ хэмжээ ябуулганууд тон ехэ харагшадай ан­харал татаа гэлтэй. Бидэ мүнөө “Z club” гэһэн һүниин клубта ахалагша ангиин һурагшадта болон эхин ша­тын оюутадта сейшн болон “Шэнэ жэл хаана байдаг бэ?” гэһэн наада харуулхабди. “Буряад Уласай Толгойлог­шын Ёлко” гэһэн хэмжээ үнгэргэхэ харалганда илаабди, тэрэмнай ФСК соо декабриин 28-да болохо. Энэ жэлдэ шэнэ түхеэрэлгэнүүдые: “Колесо Сира” гэжэ түхеэрэлгэ болон акробадые 15 метр үндэртэ өөдэнь шэдэхэ арга­тай хэрэгсэлнүүдые худалдажа абаабди. Тэдэнээ хэрэ­глэн һорилго хээд, дэлхэйн рекорд табижа, Гиннессэй дэбтэртэ орохо гэжэ оролдохобди.

Санкт-Петербургын уласхоорондын соёлой фору­мой шугамаар “Байгалай домогууд” гэһэн түсэлые Ород гүрэн дотор болон хари гүрэнүүдээр харуулха тухай хэлсээ баталаабди, мүнөө гастрольнуудай ажалай бол­зорнууд хэлсэгдэжэ байна.

- Үнэхөөрөөшье, одоо ехэ амжалтатай жэл үнгэргөө байнат. Харин энэ гарахаа байһан Шэнэ жэлһээ юу хүлеэнэ гээшэбта?

- Шэнэ жэлдэ артистнуудайнгаа хүдэлхэ эрхэ байдал һайжаруулхын ажал ябуулхабди. Өөрын һорилгын, бэл­дэлгын талмайгүй байха гээшэ мүнөөнэй үрдилдөөтэ сагта муугаар нүлөөлдэг ха юм. Зундаа Байгал далайн эрьедэ өөһэдын майхан тодхожо, амарагшадта на­адаяа дэлгэхэбди. Иимэ майхан хадаа Буряад Уласай ажаһуугшадые болон аяншалагшадые һонирхуулха со­ёлой түб болохо аргатай.

Шэнэ жэл – минии эгээл дуратай һайндэр. Ямар нэгэ шэдитэ үйлэ, баяр нааданай мэдэрэл, бэлэгүүд, гэр бүлэтэеэ ехэ сагаа үнгэргэхэ арга олдогдодог. 2018 ондо “Буряад үнэн” сониной уншагшадта эди шэди­тэ үйлэнүүдтэ этигэжэ, һайхан хүсэл бодолнуудые бэелүүлжэ байгыт даа гэжэ хүсэнэб. Тэдэниие бэелүүлхэ гэбэл, манай Буряад цирк ерэжэ, наадыемнай харагты! Цирк хадаа бодорхой эди шэдитэй, үльгэрэй һайхан орон гээшэ!

- Һайнта даа, Наталья Владимировна!

Цырегма САМПИЛОВА хөөрэлдэбэ.