1434
Декабриин 26-най үдэшэ Буряад Уласай соёлой сайд Соёлма Дагаева һая бүхы гүрэн түрөөрнай суурхаһан «Алтаргана» ансамблиин суута эдир хүгжэмшэдтэй болон багшанартайнь уулзажа амаршалаа.
Сууда гараһан, баяр жаргалаар халиһан Тимур Найданов Юлия Жамбалова хоёр Шэнэ жэлэй үмэнэ Москваһаа түрэл Улаан-Үдэдөө буужа ерэбэд. Харин Марина Цыденова үшөө Москвада байна. Морин хуураар наададаг Тимур хүүгэдэй урлагай 4 дугаар һургуулида Нямдорж Нацагдорж багшада һурана. Лимбээр уянгатуулдаг Юля хүүгэдэй урлагай 7 дугаар һургуулида Виктория Михайловна Ринчиновада заалгана. Ятагаар наададаг Марина Петр Чайковскиин нэрэмжэтэ Хүгжэмэй колледжын дэргэдэхи Бау Ямпиловай нэрэмжэтэ хүгжэмэй һургуулида Ольга Дондоковна Иванова багшада һурадаг юм.
- Мүнөө жэлдэ Бүхэроссиин урилдаанда хабаадахаяа 10 мянган мэдүүлгэ ороһон байна. Тэрэ тоодо апрель соо Буряадһаамнай 40 гаран бэлигтэйшүүл урилдаанда хабаадаа һэн. Эдэ олон сооһоо таанадыел зүб шэлэжэ абаа гэжэ булта бүгэдөөрөө ехэ баяртайбди. Тиихэдэ энэ жэлэй онсо илгаань гэхэдэ – ансамбльнууд хабаадаха ёһотой байгаа. Тиимэһээ гурбан ондоо һургуулиһаа суглуулжа, “Алтарганые” байгуулһанай ашаар иимэ ехэ илалта туйлабат. Нэмэжэ хэлэхэдэ, үхибүүднай бэлэн юумэ абажа ошоогүй. Урилдаанай үедэл даабаринууд үгтөө. Тиигэбэшье, манай бэлигтэйшүүл багшанартаяа буряад арадайнгаа ирагуу хүгжэмые бүгэдэ арадта дуулгаба ха юм, - гэжэ Соёлма Дагаева сайд хэлээд, – иимэ бэрхэ шабинарые һурган хүмүүжүүлжэ байһан багшанарта, түрэлхидтэ баяр хүргэнэб, - гэжэ нэмэбэ.
Соёлма Баяртуевна Арадай Хуралай хорооной түрүүлэгшэ Цыденжап Батуевай: “Эдэл даа, түрэл Буряадтаа маанадһаа ехэ амжалта асарһан гурбан балшар багашуул” – гэжэ хэлэһэн үгэнүүдые эндэ дабтаба.
Иимэ ехэ амжалта гэнтэ ерэшэдэггүй, багшанарай эсэшэ сусашагүй ажал, түрэлхидэй дэмжэлгэ, өөһэдын оролдолго хэрэгтэй.
- 6 наһанһаан хүгжэмэй һургуулида һуранаб. Виктория Михайловна багшамни манда ехэ һайнаар заадаг. Вахмистрово һууринһаа ябадагби, түрэлхидни авто-хүлэгтэй хадаа, нэгэтэшье хожомдонгүй һургуулидаа ерээд байдагби, - гэжэ Юля хөөрэнэ. Тимур хотодо байдагшье һаа, хэдэ дахин харгы хүндэлэн гараха орёошог гэнэ.
“Синяя птица” түсэлдэ урихадаа, хабаадагшад заабол багшанартаяа ерэхэ ёһотой гэһэн байна. Энэншье тон зүб байгаа. Юуб гэхэдэ, тэрэ даабаринуудые багшагүйгөөр үхибүүд яажа дүүргэхэ һэм даа. Үхибүүд ехэ бэлдэлгэнүүдые тусхай танхим соо оркестртэй хамта үнгэргэгдэдэг байгаа, тиихэдэ байһан байрадаашье багшанартаяа бэлдэдэг байгаабди гэжэ хөөрэнэд.
Шабинараа Москва абаашажа, иимэ ехэ амжалта туйлаһан багшанар Буряадайнгаа Соёлой яаманда баяр хүргөө. Хоёрдохи шатада гарахадань, Юля Марина хоёрто гоё һайхан хубсаһануудые мэдээжэ модельер Игорь Сарапуловта колледж оюулаа гэжэ баяртайгаар мэдүүлээ.
- Спонсорнуудые бэдэрхэ гээшэ шанга ажал юм байна гэжэ ойлгообди. Туһалһан зондо ехэ баярые хүргэнэбди. Мүн баһа ятагаяа рок-композицидэ тааруулха гээшэ орёохон байгаа. Ятагамнай пентатоническэ зэмсэг ха юм. Хүгжэмшэд намайе ойлгохо даа. Тиибэ яабашье, хуу һайнаар үнгэрөө, - гэжэ Маринын багша Ольга Дондоковна баяраараа хубаалдаа.
Нямдорж Нацагдорж багша ерээдүйгээ бодолсожо ябаһанаа:
- Иимэ ехэ амжалта туйлаабди гээд лэ амаршахагүйбди. Үшөөл һайнаар ажалллаха, һураха хэрэгтэй. Бэлигтэй бэрхэ үхибүүдшье олон. Морин хуураар наададаг үхибүүдые нэгэ доро суглуулжа һургаха хүсэлтэйб. Тиигэһээр хүүгэдэй ансамбль байгуулхаб, - гэжэ хөөрэбэ.
Үндэр ехэ амжалта туйлаһан “Алтарганын” бэлигтэйшүүлые бэрхэ багшанартайнь Шэнэ жэлээр халуунаар амаршалаад, гараха жэлдэ үшөө ехэ амжалтануудые туйлахыень хүсэе.
Сэнгэ РИНЧИНОВ
Туяна ЗОНДУЕВАГАЙ гэрэл зураг
