​Буряадай оперо болон баледэй театрай тайзан дээрэ - Ариунбаатар Ганбаатар, Михаил Пирогов

Январиин 18-да Буряадай оперо болон баледэй театрай тайзан дээрэ Джакомо Пуччиниин “Тоска” гэһэн оперо табигдаха.

Тиихэдэ энэ оперодо Марио Каварадосси гэгшын роль Буряадай гүрэнэй оперо болон баледэй театрай дуушан, уласхоорондын мүрысөөнүүдэй лауреат Михаил Пирогов гүйсэдхэнэ. Һаяхана Михаил Пирогов “За заслуги перед Бурятией” гэһэн медаляар шагнагдаһан юм. Барон Скорпиагай рольдо Великобританида үнгэргэгдэһэн “Певец мира” гэһэн мүрысөөнэй шанда хүртэһэн Ариунбаатар Ганбаатар наадаха. Флория Тоска гэгшын роль Монголой габьяата артистка Уянга Унушихбаярын гүйсэдхэхэ юм. Монгол уласай оперо болон баледэй театрай дуушан, Монголой соёлой габьяата хүдэлмэрилэгшэ, «Алтан гадаһан» орденой кавалер Уянга Унушихбаярын Джакомо Пуччиниин оперодо нэгэнтэ бэшэ дуулаһан юм. 2015 ондо “Тоска” оперын түрүүшынхиеэ тайзан дээрэ табигдахада, Монголой дуушан Тоскын роль гүйсэдхэһэн байна. Тиихэдэ Михаил Пирогов Ариунбаатар Ганбаатар хоёр театрай энэ хаһада гурбадахияа хамта дуулаха. Эрхим дуушад “Кармен” болон “Бал-маскарад” оперонуудта хабаадаһан юм.

Ородой Холбоото Уласай арадай артист, Буряадай оперо болон баледэй театрай уран һайханай хүтэлбэрилэгшэ Юрий Лаптев, Ородой Холбоото Уласай габьяата артист, Мариинска театрай дирижёр Леонид Корчмар, Украинын габьяата уран зурааша, Донецкын үндэһэтэнэй акакдемическэ оперо болон баледэй театрай уран зурааша Сергей Спевякин, «Алтан баг» шангай номинант, Хабаровска хизаарай хүгжэмэй театрай модельер Наталья Сыздыкова гэгшэд “Тоска” оперо табиһан юм.

Буряад Уласай Соёлой яаманай сайтһаа гэрэл зураг абтаба.