1055
Байгша оной январиин 17-до Буряадай оперо болон баледэй театрта Буряад Уласай Соёлой габьяата хүдэлмэрилэгшэ, олон жэлэй туршада найруулагшаар хүдэлжэ байһан Галина Михайловна Майоровагай зохёохы үдэшэ үнгэргэгдэхэ.
Буряад Уласай Соёлой яаманай сайтһаа гэрэл зураг абтаба
Модест Мусоргскиин “Борис Годунов”, Александр Бородинай“Князь Игорь”, Николай Римский-Корсаковай“Царская невеста”, Пётр Чайковскиин “Иоланта” гэһэн оперонуудые Галина Майорова найруулан табиһан байна. Тиимэһээ баярай үдэшэ эдэ оперонуудһаа хэһэгүүд харагшадай анхаралда дурадхагдаха. Буряадай оперо болон баледэй мэдээжэ дуушад - Данзан Бальжинимаев, Ольга Жигмитова, Эдуард Жагбаев, Дамба Занданов болон бусад Галина Майоровагай зохёохы үдэшэдэ хабаадаха юм. Дирижёр Виталий Шевелевэй хүтэлбэри доро симфоническа оркестр энэ үдэшэ ирагуу хүгжэм гүйсэдхэхэ.
