1151
«Две столицы в рождество» гэһэн түсэлдэ Санкт-Петербургын «Сияние звёзд» болон Москва хотын «Московские каникулы» гэһэн уласхоорондын хоёр фестиваль-мүрысөөн оруулагдаһан байна.
Ородой Холбоото Уласай бүхы можо нютагуудай зохёохы эрхим бүлэгүүд олон жанртай заншалта мүрысөөндэ хабаададаг юм.
Захаамин аймагай Закаменск хотынхүүгэдэй урлагай һургуулиин шабинар, ятага дээрэ наададаг басагадай «Аялга» ансамблиин хабаадагшад Аида Бальжанова болон Алина Норбоева хоёр энэ удаа уласаа түлөөлбэ. Аида Бальжанова Закаменск хотын 1 дүгээр һургуулиин 9-дэхи ангида, Алина 5 дугаар һургуулиин 6-дахи ангида һурадаг юм. Ансамблиин хүтэлбэрилэгшэ Татьяна Панжиевна Норбоева 35 жэлэй туршада арадай хүгжэмэй зэмсэг – ятага дээрэ үхибүүдые наадажа һургана.
Буряад Уласаа түлөөлһэн бэлигтэй басагад Санкт-Петербургын «Сияние звёзд» гэһэн фестиваль-мүрысөөндэ 2-дохи шатын дипломоор шагнагдаа. Тиихэдэ Москва хотодо үнгэргэгдэһэн хэмжээ ябуулгада 1-дэхи шатын дипломдо хүртэһэн байна.
Закаменск хотын хүүгэдэй һургуулиин захиргаан һурагшадаа Ород гүрэнэй хэмжээндэ үнгэргэгдэһэн мүрысөөндэ эльгээжэ, бэлиг талаангаа улам мүлижүүлжэ, олондо харуулха арга боломжо олгоһон байна.
Буряад Уласай Соёлой яаманай сайтһаа гэрэл зураг абтаба.
