1411
Байгша оной февралиин 22-то үглөөнэй 11 сагһаа 14 болотор уласай тамирай-спортын байшанда үндэһэн соёлой һургуулинуудай эблэл Сагаалганай найр наада үнгэргэхэ.
Буряад Уласай үндэһэн һургуулинуудай эблэл 2014 ондо баййгуулагдажа, тэрэнэй бүридэлдэ Улаан-Үдын болон аймагуудай 9 һургуулинууд ороһон байха юм. Буряад Уласай Болбосоролой болон эрдэм ухаанай сайд Баир Жалсановай хэлэһээр, энэ хэмжээ ябуулгада Эрхүү можын болон Үбэр Байгалай хизаарай болбосоролой сайдууд Валентина Перегудова болон Андрей Томских гэгшэд хабаадаха юм.
- Хүршэ можо нютагуудай болбосоролой һалбариин хүтэлбэрилэгшэд манай урилга баяртайгаар угтан абаба. Сагаалганай найр нааданай үедэ буряад хэлэ зааха талаар ниитэ нэгэ болбосоролой оршон байгуулха талаар хэлсээ баталхабди, - гэжэ Баир Жалсанов хэлэбэ.
Үндэһэн соёлой һургуулинуудай эблэлэй бүридэлдэ орогшод буряад арадай ёһо заншал, соёл һэргээхэ, хүгжөөхэ талаар ажал ябуулдаг юм. Сагаалганай найр нааданай үедэ буряад һургуулиин эрхим түхэл шэлэгдэхэ. Сагаа һарын угтамжада зорюулагдаһан мүрысөөн 5 шатаһаа бүридэхэ гэжэ түсэблэгдэнхэй.
Түрүүшын «Айлшалыт манайда» гэһэн шатада, хабаадагшад гараар хэгдэһэн уран бүтээлнүүдэй үзэсхэлэн болон үндэһэн арадай эдеэ хоол дэлгэхэ. Мүрысөөнэй үедэ энэ үзэсхэлэн хэр уранаар шэмэглэгдэнхэйб, гэр доторхи байдал яажа харуулагданхайб гэхэ мэтэ сэгнэгдэхэ юм. Тиихэдэ http://etno03.ru гэһэн сайтда һургуулинууд 2017 оной дүнгүүдээр «Буряад һургуулиин эрхим түхэл» гэһэн түсэлөөр тоосохо болоно. «Зуун жэлнүүдэй уг залгамжаһан баялиг» гэһэн үндэһэн хубсаһанай театр энэ хэмжээ ябуулгада олоной һонирхол түрүүлхэ гэжэ хүлеэгдэнэ. Мүрысөөндэ хабаадагшад буряад арадай үндэһэн хубсаһа гү, али буряад хубсаһанай маягаар бүтээһэн гурбан ондоо костюм харуулха юм.
Сагаалганай найр нааданай айлшад мүрысөөндэ хабаадагшадай бэлдээһн «Гуламтын гурбан тулга» гэһэн мастер-классуудта хабаадаха аргатай. Үнгэрһэн жэлнүүдтэ һээр шааха, ташуур гүрэхэ, малгай оёхо, үльгэр омог түүрээхэ гэһэн болон бусад мастер-классууд үнгэргэгдөө. Сагаалганай найрай түгэсхэлэй шатада «Һайндэрэй амаршалга» гэһэн уран һайханай наадан харуулагдаха.
Үндэһэн соёлой һургуулинуудай эблэлдэ ородог болбосоролой гуламтанууд:
1. Буряадай 29 дүгээр гимнази.
2. Хэжэнгэ аймагай Хэжэнгын юрэнхы болбосоролой дунда һургуули-интернат.
3. Захаамин аймагай Сахирай юрэнхы болбосоролой дунда һургуули-интернат.
4. Түнхэн аймагай Шэмхын юрэнхы болбосоролой дунда һургуули-интернат.
5. Мухар-Шэбэр аймагай Алташын Адагай юрэнхы болбосоролой дунда һургуули-интернат.
6. Загарай аймагай А. Доржиевай нэрэмжэтэ Асагадай юрэнхы болбосоролой дунда һургуули-интернат.
7. Зэдэ аймагай Н. С. Сосоровой нэрэмжэтэ Сагаатайн дунда һургуули.
8. Буряад Уласай Үндэһэтэнэй 1 дүгээр лицей-интернат.
9. Хэжэнгэ аймагай В.С.Мункинай нэрэмжэтэ Хэжэнгын лицей.
Анна Огороднигой гэрэл зураг
