1083
Буряад Уласай Соёлой яаманай сайтһаа гэрэл зураг абтаба
Байгша оной февралиин 1-дэ Буряадай оперо болон баледэй театрта Сталинград шадар болоһон байлдаанай 75 жэлэй ойн баярта зорюулһан тоглолто үнгэргэгдэхэ юм.
Зүблэлтэ сагай ирагуу найрагша Михаил Львовой “Поклонимся Великим тем годам” гэһэн шүлэгэй мүрнүүдээр тоглолто нэрлэгдэһэн байна. Энэ үдэшэ хото-герой Сталинградай ажаһуугшадай баатаршалга, эрэлхэг зориг түүрээһэн шүлэгүүд болон дуунууд зэдэлхэ. Дирижёр Валерий Волчанецкиин хүтэлбэри доро Буряадай оперо болон баледэй театрай симфоническа оркестр хүгжэм наадаха. Тиихэдэ Валентина Цыдыпова, Михаил Пирогов, Лариса Соковикова, Эдуард Жагбаев болон бусад мэдээжэ дуушад энэ тоглолтодо хабаадаха юм.
Эсэгэ ороноо хамгаалгын Агууехэ дайнай үедэ Үбэр Байгалай ажаһуугшадһаа бүридэһэн 321-дэхи дивизиин Сталинград шадар байлдаанда эрэлхэг зоригтойгоор хабаадаһан тухай Солбон Лыгденовэй буулгажа байһан «321-я Сибирская» гэһэн фильмһээ хэһэг харуулагдаха. Найруулагша Солбон Лыгденов болон гол рольнуудай нэгые гүйсэдхэһэн Георгий Дронов кинофильмтай танилсуулха юм. Тиихэдэ театрай фойедэ «321-я Сибирская» фильм дээрэ хүдэлэгшэдэй бэлдэһэн гэрэл зурагуудай үзэсхэлэн дэлгэгдэхэ.
