​Захааминай хүүгэд дэлхэйдэ суурхаба

Захааминай хүүгэдэй урлалай һургуулиин шабинар Аида Бальжанова Алина Норбоева хоёр “Хоёр ни­ислэл Рождестводо” гэһэн уласхоорондын түсэлдэ эрхимээр хабаадажа, баяр жаргалаар халиһан Татьяна Норбоева багшатаяа түрэл Буряадтаа бусажа ерэбэд.

Энэ түсэлэй ёһоор, уласхоорондын хоёр ехэ фестиваль-урилдаанууд үнгэргэгдөө: “Одо мүшэдэй толороон“ (“Сияние звёзд”) - хойто ниислэл Санкт-Петербургда (январиин 6-9) болон “Москвадахи ама­ралтанууд” (“Московские каникулы”) - зүрхэн ниис­лэл Москвада (январиин 10-13). Эдэ урилдаанууд­та Ородой Холбоото Ула­сай можо хизаарнуудһаа, хари гүрэнүүдһээ, тэрэ то­одо манай хүршэ Монгол Уласһаа эрхимэй эрхим бэлигтэйшүүл хабаадаа. Ма­най Аида Алина хоёр ятага­ар наададаг юм. Тиимэһээ монгол бэлигтэйшүүлтэй тэмсэжэ уридшалһандань бахархамаар.

Иимэ ехэ урилдаану­удта хабаадахадаа, манай үхибүүд бэлиг шадабаряараа дэлхэйн олондо су­урхажа, түрэл буряад ара­дайнгаа мүхэшэгүй соёлые бодото дээрэнь харуулжа, буурал эхэ Буряад оро­нойнгоо, тоонто Захаами­найнгаа һүр һүлдые одото тэнгэридэ үргэхэһөө гад­на, сэгнэшэгүй ехэ сог зали сэдьхэлдээ бадаруулжа, Эхэ оронойнгоо хоёр ниислэ­лые Шэнэ жэлэй жабхалан­та найрай үедэ хараһанаа наһан соогоо мартангүй, сэдьхэл зүрхэндөө һанан бөөмэйлжэ ябахал даа.

Аида Алина хоёрнай ян­вариин 7-до Санкт-Петербургда Э. Батсуухай «Ээж минь» ирагуу хүгжэмөө наадахадаа, бүхы зони­ие болон манайшье, хари гүрэнүүдэйшье соёлой, ур­лалай дэлхэйдэ мэдээжэ бэлигтэйшүүлые гайхуулаа. Дайдын холо захын аман Захааминда иимэ бэлигтэй бэрхэ үхибүүд байдаг юм гэжэ хэнииньшье һанаагүй ха юм. Тиимэһээ “Одо мүшэдэй толороон“ соо ёһотойл ододынь боложо шалгараа. Тиигэжэ бэлигтэй бэрхэ басагадаймнай II шатын кубогта, дипломдо болон үшөө “Зохидшоол­гын шан” гэһэн тусхай шан­да хүртэһэниинь гайхалгүй. Харин Москвада энэ ехэ урилдаандаанда буряад арадайнгаа «Тэргынгээ хо­лисоо» уран гоёор наадажа, бэлиг шадабарияа гэршэл­жэ шадаһан басагадтам­най хүрэхэ бэлигтэйшүүл байгаагүй. Холо ойгуур суурхаһан басагаднай “Москвадахи амаралтануудай” илалтын кубогаар, лауре­адай I шатын дипломоор шагнагдажа, үнэтэ бэлэгээр урмашуулагдаа.

Буряад орондоо

Сурбалжалагшадтай хөөрэлдэхэдөө, илалта туйла­жа ерэһэн басагад ехээр хүүежэ байнгүй, харин энэ ехэ амжалтаһаань гайхаһан мэтэ байгаашье һаа, нэн түрүүн Татьяна Панжиев­на багшадаа тон ехэ баярые хүргэжэ байһанаа мэдүүлээ. Ёоеын холо Ёнгорбой нютагһаа угтай Аида мүнөө Закаменск хотын 1-дүгээр һургуулиин 9-дэхи анги­да һурана. Үнгэрһэн жэл Захааминай урлалай һургуули улаан дипломоор дүүргэһэн.

- Мүнөө хүгжэмэйнгөө һургуулиин ятагашадай “Аялга” ансамбльда нааданаб. 9-дэхиеэ дүүргээд, Петр Чайковскиин нэрэм­жэтэ колледждо һуралсалаа үргэлжэлүүлхэб, - гэжэ Аида мэдүүлбэ.

Сэлгеэ һайхан Санага нютаг тоонтотой Алина 5-дугаар һургуулиин 6-дахи ангида һурана. Урлалай һургуулида 4-дэхи жэлээ һуража ябана.

Эдэ хүүгэдэй талаан бэ­лигээ хүсэд дүүрэнээр дэл­гэжэ шадаһандань Татьяна Норбоева багшын габьяа ехэ ааб даа. Татьяна Пан­жиевна хадаа Буряадай хүгжэмэй училищиин бэл­дэжэ гаргаһан түрүүшын ятагашадай нэгэн юм.

- Мүнөөшье болотор Ва­лентина Цыденовна Нико­лаева багшаяа сэдьхэлдээ һайханаар дурсажа ябадаг­би, - гэжэ Татьяна Панжи­евна хөөрэнэ. Мүнөө өөрөө һургуулияа түгэсхэһөөр 35- дахи жэлээ багшалжа ябана. Түрэл Санагадаа 21 жэлэй туршада багшалаа. 2004 онһоо Захааминай хүүгэдэй урлалай һургуулида ам­жалта түгэс хүдэлнэ. Эдэ олон жэлнүүдтэ бэлигтэй багша хэды олон хүүгэдые хүмүүжүүлжэ гаргаа гээ­шэб, тоолоодшье яахамнайб. Имагтал ятагаар мэргэжэһэн шабинарынь нэрлэе.

Оюна Гундуева, мүнөө Дылгырова - колледжын багша, эрдэмэй дид-доктор, Буряад FM радиогой За­хааминай дамжуулгануу­дые ябуулагша юм. Оюна Санжижаповна Буряадай этно-соёлой “Хараасгай” бүлгэм байгуулаад, өөрөө хүтэлбэрилнэ.

Бэлигтэй бэрхэ Туя­на Григорьева Буряадай гүрэнэй “Байгал” театрай оркестртэ наадана. Ирина Лубсанова Пётр Чайков­скиин нэрэмжэтэ колледж дүүргэжэ ябана. Энэл кол­ледж эрхимээр дүүргээд, мүнөө Зүүн Сибириин соёлой академидэ Намсалма Жамсаранова һурана.

Хүн бүхэнэй бэлиг түрэлхидһөөл үгтэдэг гээ­шэ. Манай сурбалжалагша Алинын эжы Дарима Гун­дуеватай танилсаа. Сана­гын ажалша малша айлай басаган Дарима Раднаев­на дүрбэн үхибүүдэй эжы юм байна. Ехэ хүбүүдынь һургуулияа дүүргэнхэй. Аг­ван сэрэгэй алба дүүргээд ерээ, харин Санжай Амарай хизаарта алба хэжэ байна. 3-дахи ангида һурадаг од­хон Баир тамирай секцидэ, хатарай бүлгэмдэ ябадаг. Иимэ гурбан аха дүүнэрэй дундаһаа Алина басаган то­доржо, уран бэлигээрээ одо заяагаа гэрэлтүүлжэ ябана ха юм.

Мүнөө сагта холо ойгуур хэдэн хоногоор ябажа ерэхэ гээшэмнай туйлай ехэ гар­гашатай хэрэг гэжэ булта мэдэнэбди. Тиимэһээ улас­хоорондын энэ ехэ урилдаа­най эмхидхэлэй хороон ма­най басагадта туһа хүргэһэн Арадай Хуралай һунгамал Виталий Лыгденовтэ Бая­рай бэшэг эльгээгээ.

Сэнгэ РИНЧИНОВ