Январиин 26-да Буряад драмын театрай тайзан дээрэ “Үльгэр” театр «РУСЛАН ЛЮДМИЛА хоёр» гэһэн зүжэгөө табиба.
XIX зуун жэлдэ энэ үльгэр-поэмые зохёоһон Александр Пушкинда мэдээжэ ирагуу найрагша Василий Жуковский “Илаһан шабидаа илагдаһан багшаһаа” гэһэн суута тэмдэгтэй дүрэ зурагаа бэлэглээ һэн. Иимэ зохёол мүнөө сагта тайзан дээрэ табихын тула ехэл зориг хэрэгтэй гэжэ ойлгосотой.
Үе сагуудай уулзуурта соёл урлалай, заншал гуримуудай һэлгэлдээн, холисолдоониие “Үльгэр” театрайхид өөрын онсо аргануудаар тобойсо харуулжа шадабал даа гэжэ харагшад, сурбалжалагшад тэмдэглээ. Иигээд харахада, мүнөө сагта хүүхэлдэйнүүдэй нааданай арга боломжонууд тон ехэ юм байна гэжэ ойлгомоор.
Эхилхэдээ, һүр бадаруулма хүгжэм зэдэлжэ, үнэхөөр үльгэрэй орондо айлшалхые урина. Нааданай үедэ хурса гуурһаяа бариһан уран зохёолшо геройнуудтаяа адли ажабайдалдань хабаадана. Айхабтар удхатай энэ дүрэ найруулагшадай тон һайн амжалта гэжэ тэмдэглэлтэй.
Ирагуу хүгжэмэй зэдэлээн доро артистнарай, хүүхэлдэйнүүдэй няд гэһэн тодо наадые, хатарые харахадаа, имагтал зуун жэлнүүдые гаталһан эрхим жэшээтэ зохёол арадуудай соёлые нэгэдхэнэ, тиигэжэ дэлхэйн арадуудые нэгэдүүлнэ гэжэ ойлгогдоно.
- Эндэ тэмдэглэхэдэ, Ородой Холбоото Уласай Соёлой яаманай туһаламжаар энэ зүжэгнай табигдаба, - гэжэ “Үльгэрэй” уран һайханай хүтэлбэрилэгшэ Эрдэни Жалцанов хэлээ.
Тиихэдээ театрай урилгаар ерэжэ, энэ зүжэг найруулһан Яна Тумина, уран зурааша-найруулагша Кира Камалдинова, хубсаһанай зурааша Анисия Кронидова, хореограф Алишер Хапсанов болон хүгжэмынь зохёоһон Анатолий Гонье гэгшэдтэ баяр баясхаланаа, мүн Буряад драмын театрта талархалаа мэдүүлээ.
Сэнгэ РИНЧИНОВ
Буряад Уласай Соёлой яаманай хэблэлэй албанай сайтһаа гэрэл зураг